مسیحی برادری آج کرسمس منا رہی ہے : ملتان ٹی ہاؤس میں کیک کاٹا گیا

ملتان ۔۔ اے پی پی ۔۔ سمیت پورے جنوبی پنجاب میں مسیحی برادری آج کرسمس کا تہوار جوش و خروش کے ساتھ منا رہی ۔اس حوالے سے ملتان کے مختلف گرجا گھروں میں دعائیہ تقریبات منعقد ہوئیں اور مٹھائیاں تقسیم کی گئیں۔تقریب میں مسیحی خواتین ، بچوں اور نوجوانوں نے شرکت کی اور ملک وقوم کی خوشحالی اور سلامتی کے لیے دعائیں مانگیں۔ ملتان ٹی ہاؤس میں نامور شاعروں،ادیبوں کالم نگاروں،صحافیوں اور دانشوروں نے معروف شاعر،کالم نگار اور سفر نامہ نگار جاوید یاد کے ساتھ مل کر کرسمس کیک کاٹا۔شرکاء میں شاکر حسین شاکر،رضی الدین رضی،اظہر سلیم مجوکہ،مستحسن خیال خلجی،ارشد بخاری ،ناصر ظہیر،ظہیر عباس ، شہزاد عمران خان ، عمران علی خان ، ولیم اقبال ناصری ،یوسف سلیم قادری عامر وسیم قادری و دیگر شامل تھے ۔کرسمس کے موقع پر سکیورٹی کے سخت انتظامات کیے گئے ہیں کرسمس کے موقع پر ضلع ملتان میں 41 گرجا گھروں میں عبادات منعقد ہوئیں ، جن میں سے 3 چرچ حساس نوعیت کے ہیں۔
کراچی کے سینٹ پیٹرک چرچ میں کرسمس کی دعائیہ تقریب کا اہتمام کیا گیا جس میں مسیحی برادری نے بڑی تعدادمیں شرکت کی۔
حیدرآباد میں رات گئے سینٹ فرانس چرچ میں کرسمس کے حوالے سے دعائیہ تقریب ہوئی اور مٹھائیاں تقسیم کی گئیں۔
تقریب میں مسیحی خواتین ، بچوں اور نوجوانوں نے شرکت کرکے ملک وقوم کی خوشحالی اور سلامتی کے لیے دعائیں مانگی۔
فیصل آباد میں مسیحی خواتین نے کرسمس کے لیے خریداری کیں جبکہ گوجرانوالا کے کرسمس بازار میں مسیحی برادری کے لیے 20 فیصد تک ڈسکاؤنٹ تھا۔
ادھر کوئٹہ میں بیکریوں اور کیک شاپس میں کرسمس کے حوالے سے ڈیزائن کردہ کیکس کی دھوم ہے۔لاہور میں بھی مسیحی برادری کرسمس منانے کے لیے پرجوش ہے۔
سرگودھا میں گرجا گھروں میں دعائیہ تقریبات منعقد کی جارہی ہیں جبکہ سکھر کےگرجا گھروں میں کرسمس کی خوشی میں کیک کا ٹےگئے۔
کرسمس کے موقع پر ملک بھر کی طرح پشاور میں بھی چرچز اور گھروں کو خوبصورتی سے سجایا گیا ہے۔ مسیحی برادری نے گھروں کو کرسمس ٹریز سے مزین کرلیا۔صدر آصف زرداری اور وزیراعظم شہباز شریف نے پاکستان سمیت دنیا بھر میں مسیحی برادری کو کرسمس کی مبارک باد دی ہے۔
صدر مملکت نے اپنے پیغام میں کہا کرسمس محبت، سخاوت، رحم، اتحاد اور امید کی ترغیب دلاتی ہے۔وزیراعظم نے کہا کہ کرسمس پر ہمیں امن، بھائی چارے اور محبت کے پیغام پر غور کرنا چاہیے ، حکومت پاکستان تمام مذہبی برادریوں کے حقوق کے تحفظ کیلئے پرعزم ہے ۔