انٹرنیشنل کرکٹ کونسل (آئی سی سی) نے ویمنز کرکٹ ورلڈکپ کوالیفائر 2025 کی ’ٹیم آف دی ٹورنامنٹ‘ کا اعلان کردیا جس کی قیادت قومی ویمنز ٹیم کی کپتان فاطمہ ثنا کو سونپی گئی ہے۔
آئی سی سی کی ویب سائٹ پر جاری ٹیم آف دی ٹورنامنٹ میں ویمنز کرکٹ ورلڈکپ کوالیفائیر میں شامل 4 ٹیموں سے کھلاڑیوں کو منتخب کیا گیا ہے۔
ویمنز کرکٹ ورلڈکپ کوالیفائر 2025 کی ٹیم آف دی ٹورنامنٹ پاکستان ویمنز ٹیم کی 4، ویسٹ انڈیز 3، بنگلہ دیش اور اسکاٹ لینڈ کی 2،2 کھلاڑی شامل ہیں۔
ویمنز کرکٹ ورلڈکپ کوالیفائر 2025 کی ٹیم آف دی ٹورنامنٹ کی قیادت فاطمہ ثنا کو سونپی گئی ہے جنہوں نے ٹورنامنٹ میں اپنی قائدانہ صلاحیتوں کی بدولت پاکستان ویمنز ٹیم کو تمام پانچوں میچوں میں کامیابی دلواکر ورلڈکپ کے لیےکوالیفائی کروانے میں اہم کردار ادا کیا۔
یاد رہے کہ فاطمہ ثنا نے نہ صرف بطور کپتان بروقت فیصلے لے کر جیت میں اہم کردار ادا کیا بلکہ ٹورنامنٹ میں ان کی بطور آل راؤنڈر کارکردگی بھی بہترین رہی، انہوں نے ٹورنامنٹ میں مجموعی طور پر 103 رنز بنائے اور 12 وکٹیں حاصل کیں۔
آئی سی سی کے مطابق فاطمہ ثنا پاکستان کے لیے ٹورنامنٹ کے دوران ایک اہم کھلاڑی ثابت ہوئیں، جنہوں نے نہ صرف بیٹنگ میں رنز بنائے بلکہ باؤلنگ کے شعبے میں اہم موقع پر ٹیم کے لیے وکٹیں حاصل کیں۔
ویمنز کرکٹ ورلڈکپ کوالیفائر 2025 کی ٹیم آف دی ٹورنامنٹ میں فاطمہ ثنا کے علاوہ قومی ٹیم کے دیگر کھلاڑیوں میں منیبہ علی، نشتہ سندھو اور سعدیہ اقبال شامل ہیں۔
اسی طرح، بنگلہ دیش کی شرمین اختر اور نگار سلطانہ، ویسٹ انڈیز کی ہیلے میتھیوز، عالیہ علین اور شنیل ہنری ٹیم میں شامل ہیں، اسکاٹ لینڈ کیتھرین برائس اور کیتھرین فریزر بھی ٹیم کا حصہ ہیں جب کہ بنگلہ دیش کی رابعہ خان کو ریزرو کھلاڑی کے طور پر منتخب کیا گیا ہے۔
واضح رہے کہ پاکستان میں ہونے والے آئی سی سی ویمنز کرکٹ ورلڈکپ کوالیفائر میں قومی ویمنز ٹیم ناقابل شکست رہی۔
ورلڈکپ کے لیے کوالیفائی کرنے پر چیئرمین پی سی بی محسن نقوی نے قومی ویمنز ٹیم کی کارکردگی کی تعریف کرتے ہوئے ان کے لیے انعامات کا اعلان بھی کیا۔
لاہور اسٹیڈیم میں صحافیوں سے گفتگو کے دوران محسن نقوی نے واضح کیا کہ پاکستان کرکٹ ٹیم ویمنز ورلڈ کپ میں شرکت کے لیے بھارت نہیں جائے گی، معاہدے کے تحت میزبان ملک بھارت کو طے کرنا ہے کہ وہ نیوٹرل وینیو کونسا چنتا ہے، وہ جو بھی مقام رکھتے ہیں ہماری ٹیم وہاں جائے گی لیکن بھارت نہیں جائے گی۔
فیس بک کمینٹ