پاکستان سپر لیگ (پی ایس ایل) کے 13ویں میچ میں اسلام آباد یونائیٹڈ نے ملتان سلطانز کو 7 وکٹوں سے شکست دے دی۔
ملتان کرکٹ اسٹیڈیم میں کھیلے گئے میچ میں ملتان سلطانز نے پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 168 رنز بنائے۔
اسلام آباد یونائیٹڈ نے مطلوبہ ہدف اندریس گوس کی جارحانہ بلے بازی کی بدولت 3 وکٹ کے نقصان پر 17 گیندیں قبل ہی حاصل کرلیا۔
ملتان سلطانز بیٹنگ
اس سے قبل میچ کا ٹاس ملتان سلطانز کے کپتان محمد رضوان نے جیت کر اسلام آباد یونائیٹڈ کے خلاف پہلے خود بیٹنگ کرنے کا فیصلہ کیا۔
ملتان سلطانز کی جانب سے یاسر خان اور محمد رضوان نے آج بھی ٹیم کو اچھا آغاز فراہم کیا، یاسر خان 29 رنز کی اننگز کھیلنے کے بعد آؤٹ ہوئے۔
کپتان محمد رضوان نے 36 رنز بنائے جب کہ عثمان خان نے جارحانہ اننگز کھیلتے ہوئے اپنی نصف سینچری مکمل کی ، وہ 4 چھکوں اور اتنے ہی چوکوں کی مدد سے 61 رنز بناکر آؤٹ ہوئے۔ مائیکل بریسویل 9، افتخار احمد 10 رنز بناسکے۔
اسلام آباد یونائیٹڈ کی جانب سے شاداب خان، محمد نواز، جیسن ہولڈر ، ریلے میریدتھ نے ایک ایک وکٹ حاصل کی ۔
اسلام آباد یونائیٹڈ بیٹنگ
اسلام آباد کے ان فارم اوپننگ بلے باز صاحبزادہ فرحان نے آج بھی ٹیم کو جارحانہ آغاز فراہم کیا وہ 13 گیندوں پر 22 رنز بناکر آؤٹ ہوئے۔
تاہم، تیسرے نمبر پر بیٹنگ کے لیے آنے والے کولن منرو نے ایندریس گوس کے ساتھ ملکر 81 رنز کی اہم شراکت قائم کی، کولن منرو 28 گیندوں پر 45 رنز بنانے کے بعد آؤٹ ہوئے۔
پی ایس ایل میں اپنی پہلی نصف سینچری بنانے والے ایندریس گوس 80 رنز پر ناقابل شکست رہے اور انہوں نے ہی وننگ شارٹ کھیل کر ٹیم کو فتح سے ہمکنار کروایا۔
ایندریس گوس نے 45 گیندوں پر 80 رنز کی اننگز کھیلی جس میں 5 چھکے اور 6 چوکے شامل تھے۔
ملتان سلطانز کی جانب سے کرس جورڈن، عبید شاہ، مائیکل بریسویل نے ایک ایک وکٹ حاصل کی۔
واضح رہے کہ ملتان سلطانز پی ایس ایل 10 میں اب تک فتح سے محروم رہی تھی، تاہم گزشتہ روز اپنے ہوم اسٹیڈیم میں انہوں نے لاہور قلندرز کو شکست دے کر ٹورنامنٹ میں پہلی کامیابی حاصل کی۔
ملتان سلطانز کو پہلے میچ میں کراچی کنگز کے ہاتھوں 4 وکٹوں کی شکست کا سامنا کرنا پڑا اور دوسرے میچ میں اسلام آباد یونائیٹڈ نے ملتان سلطانز کو 47 رنز سے شکست دی جب کہ تیسرے میچ میں پشاور زلمی نے 120 رنز سے شکست دی۔
دوسری جانب، دفاعی چیمپئن اسلام آباد یونائیٹڈ اب تک ناقابل شکست رہی ہے اور اسے چاروں میچوں میں کامیابی حاصل ہوئی ہے۔
فیس بک کمینٹ