اگر ابھی بھی بلاول زرداری یہ باور نہیں کرپائے کہ پی ڈی ایم کے ذریعے وہ اپنے نانا اور شہید ماں کی سیاسی اور نظریاتی ساکھ کو اور ان کے لہو سے سینچی ہوئی پاکستان پیپلز پارٹی کے بچے کھچے مستقبل کو دا ؤ پر لگا رہے ہیں اور ان سینکڑوں کارکنوں کی قربانی کو غیر نظریاتی قوتوں ،اقتدار کی حرص و ہوس میں ڈوبے ہوئے لوگوں کی بھینٹ چڑھا رہے رہے ہیں ،تو ان کی سیاسی اور نظریاتی سوچ مطلق زنگ آلود ہو چکی ہے اور وہ بھی فقط اور فقط اقتدار کی جنگ لڑ رہے ہیں جو شہید بے نظیر بھٹوکا راستہ ضرور تھا ،منزل نہیں۔
پی ڈی ایم لاہور کے جلسے کے موقع پر پی پی پی کے کارکنوں کے ساتھ جو سلوک روا رکھا گیا وہ کسی سے مخفی نہیں تھا۔مولانا کے کارکنوں کے ساتھ جو رویہ اختیار کیا گیا وہ بھی ان کی آہ و زاریوں سے عیاں تھا کہ وہ بریانی کی ایک ایک پلیٹ کو ترس رہے تھے ۔کوئی ان کی خبر لینے والا نہیں تھا۔جہاں تک مولانا کاتعلق ہے ،ان کے پاس سرے سے کوئی نظریاتی ایجنڈا ہے ہی نہیں وہ سیاسی منافرت اور ذاتی مصلحت کی جنگ لڑ رہے ہیں ،ویسے بھی مسلم لیگ اور جمیعت علماءاسلام کے درمیان تو قیام پاکستان کے مسئلہ پر بھی بعدالمشرقین رہا ہے ،رہے انس نورانی ،تو وہ سیاسی یتیم ٹھہرے ،انہیں معلوم ہی نہیں کہ مولانا شاہ احمد نورانی ؒ کس قبیلے کے سیاستدان تھے ،اصول پسند اور دو ٹوک رائے رکھنے والے ،استقامت کاپہاڑجنہوں نے مصلحت کیشی کی سیاست کبھی کی ہی نہ تھی اور پاکستان کے ساتھ ان کی محبت بھی مثالی تھی۔ان کی جماعت نے عبدالستار نیازی ؒ جیسے رہنما پیدا کئے جو پھانسی کے پھندے کو چوم لینے سے بھی گریز پا نہ ہوئے۔
پی ٹی آئی حکومت خوش قسمت ہے کہ پی ڈی ٰایم کی سیاسی تحریک کو کورونا جیسی مہلک وبا کے کڑے حالات کا سامنا ہے ،اس پر بلا کی سردی اور برفانی ہوائیں ،جو لوگوں کو گھروں سے نکلنے کے راستے کی دیوار یں بنی ہوئی ہیں ،وگرنہ فردوس عاشق اعوان اور فیاض الحسن جیسے ناشائستہ اور سیاسی نابلوغیت کے بیانات دینے والوں کی دال کیا کیا گلنا تھی ،جو بے پر کی اڑانے سے تھک نہیں رہے ۔شبلی فراز صاحب کو سنجیدہ ترجمان کہا جاسکتا تھا مگر وہ بھی مجبوری کی زبان بولنے کے پابندہیں ۔جہاں تک الیکٹرانک میڈیا کا تعلق ہے وہ اپنا اعتبار ویسے ہی کھو چکا ہے ۔پرنٹ میڈیا کے چند لوگ ہیں جو دروغِ مصلحت آمیز کے عروج کے دنوں میں ایک مجرد سچائی کے طور پر چیخ و پکار پر مصر ہیں ،مگر نقار خانے میں طوطی کی آواز پرکون کان دھرتا ہے۔
جہاں تک سیاسی کارکنوں کا تعلق ہے یہ کسی منشور اور نظریئے کی آبیاری کا سودا سر میں سجائے ،سیاسی جماعتوں کے پرچم اٹھائے اپنے لئے مارے مارے نہیں پھرتے بلکہ مجبوریءحالات اور اپنے بچوں کی دووقت کی روٹی کی خاطر زندگی کی اعلیٰ ترین سہولیات کے ساتھ جینے والوں کی آئیندہ نسلوں کے مستقبل کے تحفظ کے لئے اپنے اپنے لہو کے نذرانے پیش کرنے کے لئے دن رات ایک کرتے ہیں ۔ان راندہ درگاہ لوگوں کی اپنی آئیندہ نسلوں کا مقدر بھی جہالت اور بیماریاں ہیں جو اِن کے اجسام سے زندگی تک نچوڑ لیتی ہیں ۔
یہ وہ حقائق ہیں جن پر سنجیدہ طبقہ شدید تحفظات رکھتا ہے ،سوچنے اور غور کرنے کی بات یہ ہے کہ اسمبلیوں سے استعفوں کا ایک موثر آپشن رکھتے ہوئے اپوزیشن کو موسم اور کورونا کی ہولناکیوں کے ان حالات میں لوگوں کو سڑکوں پر لانے کی کیا ضرورت ہے ،خاص طور پر دور دراز کے شہروں اور دیہی علاقوں کے دہاڑیدار لوگ جنہیں گھروں سے لاکر موسم کے موسم کے رحم وکرم ہی پر نہیں چھوڑدیا جاتا بلکہ حالات کے جبر کے حوالے کر دیا جاتا ہے۔سیاسی جماعتوں کے چھوٹے بڑے رہنما ایئر ہیٹڈ گاڑیوں میں آتے ہیں ،ہوابند گرم کمروں میں اطلس و کمخاب کے بستروں میں سکون کی نیند کے مزے اڑاتے ہیں ،مگر جن کے کندھوں پر بندوقیں رکھتے ہیں ،اور جن کے ہاتھوں میں ڈنڈے سوٹے پکڑاتے ہیں ،ان کے پاس سامانِ سفر وحضر کے لئے ٹھٹھرتی ہوئی سانسوں کے سوا کچھ نہیں ہوتا۔
بے حس و بے درد سیاستدانوں کو افتادگان خاک کے ساتھ ہمدردی ہو ہی کیا سکتی ہے ،جو ایک طرف مہنگائی وبےروزگاری اور افراط وتفریط کی چکی میں پستے ہیں تو دوسری طرف سیاستکاروں کی ہوس اقتدار کی آگ کا ایندھن بنتے ہیں ۔یہ سرمایہ دار،صنعتکار ،وڈیرے اور صاحبان ِ منبرومحراب ،زمامِ اقتدار کا خود کو مطلق حقدار گردانتے ہیں ۔ان سیاسی پنڈتوں نے مخلوقِ خدا کو اپنا پجاری بنارکھا ہے اور اپنے اپنے آشرم آباد رکھنے کے لئے اِن کی جانوں کے چڑھاوے لیتے ہیں ۔یہ اپنی اولادوں کو حاکمیت کا ورثہ ودیعت کرنے کے لئے بیرون ملک تعلیم دلواتے ہیں اور مفلس و نادار لوگوں کے لئے اپنے ملک میں طبقاتی نظام تعلیم رائج کیا ہوا ہے ۔
بہتر سالوں سے سیاسی جماعتیں اس نظام کے خاتمے کے وعدے پر عوام کو ٹرخائے ہوئے ہیں ۔سابقہ حکومتیں ہوں یاموجودہ حکومت ،سب نے ایک ہی ڈھونگ رچایا ہوا ہے کہ ملک کو خوشحالی ،خواندگی اور عدل و انصاف کا گہوارہ بنادیں گے،مگر عملی طور پر اس کے لئے کوئی ابتدائی کوشش بھی نہیں کی گئی۔سراب کا ایک سفر ہے جو یہ قوم ننگے پاﺅں طے کررہی ہے ،مگر سفر ہے کہ ختم ہونے کونہیں آرہا۔
منیر اس ملک پر آسیب کا سایہ ہے یا کیا ہے؟
کہ ، حرکت تیز تر ہے اور سفر آہستہ ، آہستہ
(منیر نیازی)
فیس بک کمینٹ