ملتان۔ (اے پی پی):ملتان میں پیر کے روز ڈکیتی کی واردات میں ڈاکوؤں نے مزاحمت پر ایک تاجر کوقتل کردیا۔ بعدازاں شہریوں نے تشدد کرکے تینوں ڈاکوؤں کوموت کے گھاٹ اتاردیا۔واردات ملتان کے بارونق علاقے گردیزی مارکیٹ گلگشت کالونی میں جیولرکی دکان پر ہوئی۔
چارمسلح ڈاکو دکان میں داخل ہوئے اورانہوں نے مزاحمت پر مالک عالیان کو اندھا دھند فائرنگ کرکے موت کے گھاٹ اتاردیا۔بعدازاں ڈاکوؤں اور گارڈ کے مابین فائرنگ کے تبادلے میں دوراہگیرزخمی بھی ہوگئے۔ موقع پر موجودشہریوں نے تین ڈاکوؤں کوپکڑلیا اوررسیوں سے باندھ کر تشدد شروع کردیاجبکہ ایک ڈاکو فرارہونے میں کامیاب ہوگیا۔پکڑے جانے والے تین ڈاکوؤں کو بعدازاں گلگشت پولیس کے حوالے کردیاگیا۔انہیں زخمی حالت میں نشترہسپتال پہنچایا گیا جہاں تینوں ڈاکودم توڑ گئے
۔ اس موقع پر نشترہسپتال میں لواحقین اور تاجروں کی بڑی تعداد بھی پہنچ گئی جنہوں نے ہسپتال میں توڑ پھوڑ کی ۔اسی دوران لواحقین نے مقتول عالیان کاپوسٹ مارٹم کرانے سے انکارکردیا اوراس کی لاش موٹرسائیکل پر لے کر ہسپتال سے چلے گئے۔واردات کے بعد گلگشت کالونی میں تاجر سراپا احتجاج بن گئے۔ انہوں نے چونگی نمبر6ٹریفک کے لیے بند کردی۔ ٹائروں کو آگ لگائی اور پولیس کے خلاف زبردست نعرے بازی کی۔
فیس بک کمینٹ