نَجم الاَصغر شاہیا کی نظم : زندگی سے ڈرتے ہو ؟
تم خُود اعتمادی سے
کس قدَر ہو بے گانہ
کیا تمہیں لڑکپن میں
پیار مِل نہیں پایا ؟
آدمی کی شخصیّت
کم سِنی میں بنتی ہے
عہد ِ کم سِنی میں گَر
کچھ کمی سی رہ جائے
ہے یہی علاج اِس کا
عالم ِ جوانی میں
اِک حَسین چہرے کی
بے پنہ توَجُّہہ سے
پھر نئے سِرے سے ہو
اُس کی شخصیت سازی !
تم جوان ِ رَعنا ہو
عشق کیوں نہیں کرتے ؟
کیا فریق ِ ثانی کی
بَرتری سے ڈرتے ہو ؟
تم بھی ہو عجب بَھنورے
پنکھڑی سے ڈرتے ہو
بَد نصیب پروانے
روشنی سے ڈرتے ہو ؟
۔۔۔۔۔۔۔۔۔
حُسن گُل زمینوں کے
گُل فشاں درختوں میں
حُسن مرغزاروں کے
خوش نوا پرندوں میں
حُسن کِھلتے پھولوں میں
تِتلیوں کے رنگوں میں
اُن سے تم نہیں ڈرتے ؟
اِن بِنات ِ حَوّا کی
دِل کَشی سے ڈرتے ہو ؟
اِن کی سرد مِہری سے
بے رُخی سے ڈرتے ہو ؟
۔۔۔۔۔۔۔۔۔۔۔۔
ماہ طَلعَتوں میں بھی
سب نہ ایک جیسے ہوں
کچھ بہُت شگُفتہ رَو
کچھ مزاج والے ہوں
سب ستارہ چشموں کے
مختلِف ستارے ہوں
سب پری جمالوں کے
مختلِف رویّے ہوں
تم سبھی سے ڈرتے ہو ؟
ہر نگار ِ سِیمِیں کی
دوستی سے ڈرتے ہو ؟
۔۔۔۔۔۔۔۔
حُسن سے مفَر کب تک
حُسن دل کی مجبوری
حُسن سے ہے بے زاری
زندگی سے بے زاری
زندگی کلیسا کی
راہِبہ نہیں کوئی
جا نماز پر بیٹھی
زاہِدہ نہیں کوئی
زندگی ہے اِک چنچل
بے حجاب رَقّاصہ
ہاتھ تھام کے جس کا
رقص گاہ ِ عالم میں
ناچتا ہے ہر اِنساں
تم بھی اِس حَسینہ کو
بازُوؤں کے گھیرے میں
لے کے بے قراری سے
رقص کیوں نہیں کرتے ؟
نَرتکی سے ڈرتے ہو ؟
اُس سے تم نہیں ڈرتے
مولوی سے ڈرتے ہو ؟
مذہَبی جنُونی کی
دُشمنی سے ڈرتے ہو ؟
۔۔۔۔۔۔۔۔۔۔۔۔۔۔۔۔۔۔۔۔۔۔
وہ مصوّری ہو یا
شاعِری و موسیقی
ہر لطیف فن کو وہ
کم نظر فتاوٰی گَر
کافِری سمَجھتا ہے
تم عجب سپاہی ہو
رائفَل کی نالی سے
تم کو ڈر نہیں لگتا
بانسری سے ڈرتے ہو ؟
جس سے وہ ڈراتا ہے
تم اُسی سے ڈرتے ہو ؟
۔۔۔۔۔۔۔۔۔۔۔۔۔۔۔۔۔۔۔
زندگی بدن کا رقص
دھڑکنوں کا سازینہ
ساز سے تمہیں نفرت
رقص سے تمہیں نفرت
شِعر سے تمہیں نفرت
حُسن سے تمہیں نفرت
خوف نفرتوں کی جَڑ
یار ! اگر تم اِتنا ہی
زندگی سے ڈرتے ہو ؟
مر ہی کیوں نہیں جاتے
خُود کُشی سے ڈرتے ہو ؟
( دوزخ میں پہلی بارش ۔۔)