ملتان : نثری نظم کے عہد ساز شاعر اور سابق ڈپٹی پوسٹ ماسٹر جنرل عبدالرشید ہفتے کے روزلاہورمیں انتقال کرگئے ،ان کی عمر78برس تھی ۔عبدالرشید کاتعلق ملتان سے تھا،وہ ملتان کے علاقے شمس آبادمیں پیداہوئے اورابتدائی تعلیم ملتان سے ہی حاصل کی ۔پنجاب یونیورسٹی سے ایم اے انگریزی کے بعد انہوں نے مقابلے کاامتحان پاس کیا اورمحکمہ ڈاک سے منسلک ہوگئے ۔
عبدالرشید ملتان اورلاہور میں محکمہ ڈاک کے اعلیٰ عہدوں پرفائز رہے انہوں نے طویل عرصہ تک ملتان میں جی پی اومیں خدمات انجام دیں اس کے بعدوہ لاہور چلے گئے اورڈپٹی پوسٹ ماسٹرجنرل کی حیثیت سے ریٹائرہوئے ۔عبدالرشید نثری نظم کے شاعرتھے ان کی نظموں کاپہلامجموعہ ”اِنی کنُت ُمن الظالمین “کے نام سے شائع ہوا جس نے بے پناہ مقبولیت حاصل کی ۔ان کے نثری نظموں پرمشتمل بارہ سے زیادہ مجموعے شائع ہو ئے جن میں” صبح کاپہلاکبوتر“ اوردیگرمجموعے شامل ہیں ۔عبدالرشیدکی نظمیں موضوعات اوراسلوب کے حوالے سے منفردتھیں ۔ان کی وفات سے نثری نظم کے ایک عہدکاخاتمہ ہوگیا۔
ان کے دوستوں ڈاکٹرانواراحمد،اصغرندیم سید ،فیاض تحسین اورڈاکٹرصلاح الدین حیدر نے ان کی وفات پرگہرے دکھ اورصدمے کااظہارکیاہے اورکہاہے کہ نثری نظم کے حوالے سے ان کی خدمات ہمیشہ یادرکھی جائیں گی۔