کورونا : کھیل کے میدان ویران : آئی پی ایل سمیت کئی مقابلے منسوخ ، ٹیمیں واپس

ملتان ( رپورٹ عمران عثمانی ) پاکستان سمیت دنیا بھر میں کورونا وائرس نے کھیل کے میدان ویران کر دیئے ہیں پاکستان ، بنگلہ دیش ، بھارت ، انگلینڈ اور آسٹریلای میں اس حوالے سے ہنگامی اقدامات دیکھنے میں آئے ہیں ۔ پاکستان میں موجود انگلش کرکٹرز نے کورونا وائرس کے خوف سے جلد وطن واپسی پر غور شروع کردیا ہے ۔ پاکستان سپر لیگ ابھی مزید 10 دن تک جاری رہے گی لیکن انگلینڈ کے حاضر سروس کرکٹرز جیسن رائے، ایلکس ہیلز ، معین علی اور جیمز وینس سمیت تمام کھلاڑی وطن واپسی میں عجلت پسندی کا مظاہرہ کر رہے ہیں کراچی میں جمعہ سے شیڈول اگلے تمام میچ خالی گراؤ نڈ میں ہونے ہیں ۔
برطانوی میڈیا کے مطابق ورلڈ کپ ونرز سمیت تمام 15 کرکٹرز ہفتہ کی دوپہر لندن واپس روانہ ہوسکتے ہیں۔
ادھر انگلش ٹیم کولمبو میں ٹیسٹ سیریز سے قبل دوسرا پریکٹس میچ کھیل رہی تھی کہ جمعہ کو انگلینڈ کرکٹ بورڈ نے دورہ ختم کرنے کا اعلان کردیا ہے. اس طرح برطانوی کرکٹرز پہلی دستیاب فلائٹ سے کولمبو سے لندن روانہ ہونگے۔ ٹیسٹ سیریز 19 مارچ سے شروع ہونا تھی
اس سے قبل میڈیا میں دعوی کیا گیا تھا کہ دورہ جاری رہے گا اور میچ خالی گراونڈ میں ہونگے لیکن جمعہ کو ای سی بی نے کورونا وائرس کی سنجیدگی محسوس کرتے ہوئے وزارت خارجہ،سری لنکا میں برطانوی ہائی کمیشن سے مشاورت کے بعد باقاعدہ اعلان کر دیا۔ اس سے قبل آل راؤ نڈر بین سٹوکس کے زخمی ہوکر سیریز سے باہر ہونے کی تصدیق ہوئی تھی .
یاد رہے کہ” گردو پیش “نے 2 روز قبل بتا یا گیا تھا کہ میچز بند گراؤ نڈ زمیں کھیلنے کی بجائے منسوخ ہونے کے امکانات ہیں.
دوسری جانب کورونا وائرس کے سبب بنگلادیش کرکٹ ٹیم کا دورہ پاکستان منسوخ کردیا گیا ہے ۔ بنگلادیش میڈیا کے مطابق بنگلا دیش کرکٹ بورڈ نے کورونا وائرس کے پیش نظر ٹیم کو پاکستان نہ بھیجنے کا فیصلہ کیا ہے جس کے باعث تیسرے مرحلے کے تمام میچز منسوخ ہوگئے ہیں۔واضح رہے کہ بنگلادیش کرکٹ ٹیم کو 29 مارچ کو کراچی پہنچنا تھا، 30 اور 31 مارچ کو پریکٹس سیشن تھا جب کہ یکم اپریل کو واحد ایک روزہ میچ نیشنل اسٹیڈیم کراچی میں کھیلا جانا تھا۔اس کے بعد 2 تا 4 اپریل کو پھر ٹیم پریکٹس سیشن تھا اور 5 تا 9 اپریل آئی سی سی ورلڈ ٹیسٹ چیمپئن شپ میں شامل دوسرا میچ نیشنل اسٹیڈیم میں کھیلا جانا تھا۔
خیال رہے کہ حکومت نے کورونا وائرس کے باعث پاکستان سپر لیگ کے کراچی میں ہونے والے بقیہ تین میچز اور ایک پلے آف بھی بغیر شائقین کرانے کا اعلان کیا ہے۔
ادھر کورونا وائرس نے مشہور زمانہ بھارتی آئی پی ایل کو گھیر لیا.بھارتی کرکٹ بورڈ آخر کار اسے 2 ہفتے سے زائد وقت کیلئے ملتوی کرنے پر مجبور ہوگیا ہے۔اس طرح خالی اسٹیڈیمز میں ایونٹ کروانے کی تمام افواہیں بھی دم توڑ گئ ہیں. فیصلہ بھارتی بورڈ کے صدر سارو گنگولی نے اہم اجلاس کے بعد کیا .جمعہ کو ہونے والی بیٹھک کے بعد مختصر بیان میں کہا گیا ہے کہ کورونا وائرس اور حکومتی ویزا پالیسی کے سبب 29 مارچ سے شروع ہونے والی آئی پی ایل 15 اپریل تک ملتوی کی جاتی ہے۔ فیصلے سے تمام 8 فرنچائزز کو بھی آگاہ کردیا گیا ہے جن کا اجلاس ہفتہ 14 مارچ کو ہوگا اس میں اب دیگر معاملات پر غور ہوگا.