ملتان(خصوصی رپورٹ): ایران سے 600 پاکستانی زائرین جمعے اورہفتے کی درمیانی شب ملتان پہنچ گئے جن میں سے بہت سے وائرس کاشکار ہیں۔ سرکاری ذرائع اس حوالے سے خاموش ہیں تاہم بعض اطلاعات کے مطابق وائرس سے متاثرہ زائرین کی تعداد 15سے زیادہ ہے۔ان متاثرین کوڈی ایچ کیو ہسپتال شیرشاہ روڈمیں قائم کیے گئے قرنطینہ سنٹر میں رکھاگیا ہے۔یہ سنٹر گزشتہ روز ہی ہنگامی بنیادوں پرتیارکیاگیا تھا۔اس سے پہلے بھی ایرانی زائرین کی سکھر سے آنے والی بسیں پولیس سکواڈ کی مدد سے روکے بغیر ملتان سے گزاری جاتی رہیں۔
ملتان سے ان بسوں کو لاہور تک سکواڈ کیاگیا جس کے بعد لاہور کی انتظامیہ نے ان بسوں کو اپنے حصار میں لے لیا۔یہ بسیں کن شہروں میں گئی ہیں اس بارے میں متضاد اطلاعات ہیں۔ذرائع کے مطابق بسوں میں سوار زائرین نے بعض مقامات پر ہنگامہ آرائی کی اور کئی مقامات پر بسیں رکوانے کی کوشش بھی کی۔انسانی ضروریات کے تحت بعض مقامات پربسیں روک کر انہیں پولیس کی نگرانی میں اتاراگیا اوربعدازاں دوبارہ بسوں میں بٹھا کر روانہ کردیاگیا۔دریں اثناءزائرین کی ملتان میں رہائش کے لیے بعض اور سرکاری مقامات خالی کرائے جارہے ہیں۔
زندگی کے مختلف شعبوں سے تعلق رکھنے والے افراد نے مطالبہ کیا ہے کہ زائرین کی مختلف شہروں میں آمدورفت محدودکی جائے اور انہیں سکریننگ مکمل ہونے تک گھروں تک جانے کی اجازت نہ دی جائے۔
فیس بک کمینٹ