ویلنگٹن: نیوزی لینڈ میں قومی ٹیم کی شکستوں کا سلسلہ تھم نہ سکا اور بلے بازوں کی ایک مرتبہ پھر ناقص کارکردگی کے سبب نیوزی لینڈ نے پاکستان کو پہلے ٹی20 میچ میں7 وکٹوں سے شکست دے کر سیریز میں 1-0 کی برتری حاصل کر لی۔ویلنگٹن میں کھیلے گئے پہلے ٹی20 میچ میں نیوزی لینڈ نے ٹاس جیت کر پاکستان کو بیٹنگ کی دعوت دی اور کیوی باؤلرز نے یہ فیصلہ درست ثابت کر دکھایا۔ایک موقع پر قومی ٹیم 38 رنز پر چھ کھلاڑیوں سے محروم ہو چکی تھی اور جب 53 کے اسکور پر فہیم اشرف کی شکل میں ساتویں وکٹ گری تو ایسا محسوس ہونے لگا کہ شاید قومی ٹیم ٹی20 میں اپنے سب سے کم اسکور 74 رنز کا ریکارڈ توڑ ڈالے گی تاہم حسن علی نے چند ہاتھ دکھا کر ٹیم کو اس خفت سے بچ لیا۔قومی ٹیم کے 9 کھلاڑی ڈبل فیگرز میں داخل ہونے میں بھی کامیاب نہیں ہوئے اور پاکستان کی جانب سے کامیاب بلے باز بابر اعظم رہے جنہوں نے محتاط انداز میں بیٹنگ کرتے ہوئے 41 گیندوں پر 41 رنز بنائے جبکہ حسن علی نے جارحانہ طریقے سے کھیلتے ہوئے 3 چھکوں کی مدد سے 23 رنز اسکور کیے۔پاکستان کی پوری ٹیم 20ویں اوور کی چوتھی گیند پر 105 رنز بنا کر ڈھیر ہو گئی۔نیوزی لینڈ کی جانب سے ٹم ساؤتھی اور سیتھ رینز نے تین تین، مچل سینٹنر نے 2 جبکہ انارو کچن اور کولن منرو نے ایک ایک کھلاڑی کو آؤٹ کیا۔
نیوزی لینڈ نے اننگز کا آغاز کیا تو رومان رئیس نے مارٹن گپٹل اور فلپس کو جلد پویلین لوٹا کر میزبان ٹیم کو آٹھ رنز پر دو وکٹوں سے محروم کر کے پاکستان کو میچ میں واپسی کا موقع فراہم کیا لیکن ناقص فیلڈنگ نے قومی ٹیم سے یہ موقع چھین لیا۔کولن منرو اور ٹم بروس نے اننگز کو آگے بڑھانا شروع کیا اور جلد ہی پاکستان کو منرو کو آؤٹ کرنے کا موقع میسر آیا لیکن عمر امین کیچ تھامنے میں ناکام رہے اور پاکستان نے میچ میں واپسی کا نادر موقع گنوا دیا۔بروس اور منرو نے دوسری وکٹ کیلئے 49 رنز کی شراکت قائم کر کے اپنی ٹیم کو فتح کی راہ پر گامزن کیا، بروس 26 رنز بنانے کے بعد شاداب خان کی وکٹ بنے۔منرو نے روایتی انداز میں بیٹنگ کا سلسلہ جاری رکھا اور روس ٹیلر کے ساتھ مل کر 25 گیندوں قبل ہی اپنی ٹیم کو ہدف تک رسائی دلا کر میچ میں سات وکٹ سے فتح دلا دی، منرو نے 49 اور روس ٹیلر نے 22 رنز بنائے۔اس میچ میں فتح کے ساتھ ہی نیوزی لینڈ تین ٹی20 میچوں کی سیریز میں 1-0 کی برتری حاصل کر لی۔
