اسلام آباد : وزیراعظم عمران خان کے دفتر سے جاری بیان میں کہا گیا ہے کہ امیر محمد خان جوگیزئی کو گورنر بلوچستان بنانے کی خبر میں کوئی صداقت نہیں ہے۔اتور کو وزیراعظم ہاؤس کے بیان میں کہا گیا کہ امیر محمد خان جوگیزئی کو گورنر بلوچستان کا عہدہ دیا جانا محض ایک تجویز تھی کوئی حتمی فیصلہ نہیں تھا۔بیان کے مطابق امیر محمد خان کے حوالے سے سامنے آنے والے بعض شواہد کی بنا پر اس تجویز پر مزید کوئی پیش رفت نہیں ہوئی۔خیال رہے کہ ہفتہ کو یہ خبر آئی تھی کہ وزیراعظم پاکستان نے ڈاکٹر امیر محمد خان جوگیزئی کو صوبہ بلوچستان کے نئے گورنر کی حیثیت سے نامزد کیا ہے۔قومی احتساب بیورو نے 2015 میں کڈنی سینٹر میں بدعنوانی کے ایک مقدمے میں نامزد گورنر کے خلاف تحقیقات کا حکم دیا تھا۔امیر محمد خان جوگیزئی کو بلوچستان کا گورنر نامزد کرنے کے بعد مقامی ذرائع ابلاغ میں خبریں آئیں تھیں کہ انھوں نے نیب کی تحقیقات کی وجہ سے گورنر کے عہدے سے معذرت کر لی ہے تاہم اس کے کچھ دیر بعد انھوں نے مختلف ٹی وی وی چینلز سے بات کرتے ہوئے اس کی تردید کی۔بی بی سی سے بات کرتے ہوئے امیر محمد خان جوگیزئی نے کہا کہ انھوں نے یہ نہیں کہا تھا کہ وہ گورنر کا عہدہ قبول نہیں کریں گے بلکہ کہا تھا کہ جب تک نیب سے کلیئرنس نہیں ملتی اس وقت تک عہدے کا حلف نہیں اٹھائیں گے۔
( بشکریہ : بی بی سی اردو)
فیس بک کمینٹ