نئی دہلی : انڈین ریاست مہاراشٹرا کے ایک ہسپتال میں قائم کورونا وارڈ میں آگ لگنے کے باعث 13 کورونا متاثرین ہلاک ہو گئے ہیں۔ یہ کورونا مریض کورونا سینٹر کے انتہائی نگہداشت یونٹ میں داخل تھے۔ ضلع پلگھر کی انتظامیہ نے اس واقعے کی تصدیق کرتے ہوئے بتایا کہ وسائی ہسپتال میں لگنے والی آگ میں زخمی ہونے والوں کو دوسرے ہسپتالوں میں منتقل کر دیا گیا ہے۔
مقامی پولیس نے نیوز ایجنسی پی ٹی آئی کو بتایا کہ اس حادثے میں کم از کم 13 کورونا مریض ہلاک ہو چکے ہیں۔ یاد رہے کہ دو روز قبل مہاراشٹرا کے ہی ایک ہسپتال میں آکسیجن لیک ہونے کے باعث 22 مریض ہلاک ہوئے تھے۔
دوسری جانب انڈیا میں مسلسل دوسرے روز بھی کورونا متاثرین کی تعداد تین لاکھ سے زیادہ ہے ۔جمعرات کے روز انڈیا میں 332175 افراد میں کورونا وائرس کی تشخیص ہوئی ہے جبکہ 2255 اس وائرس کی وجہ سے دم توڑ گئے ہیں۔
واضح رہے کہ یہ مسلسل دوسرا روز ہے جب انڈیا میں یومیہ 3 لاکھ سے زیادہ نئے کیس رپورٹ ہو رہے ہیں۔ صرف یہی نہیں بلکہ انڈیا میں نئے یومیہ متاثرین کی یہ تعداد دنیا میں سب سے زیادہ ہے اور روزانہ کی بنیاد پر اتنی بڑی تعداد میں نئے کیس اب تک کسی اور ملک میں سامنے نہیں آئے ہیں۔
انڈیا میں کووڈ 19 کے تصدیق شدہ کیسز کی تعداد تقریباً ایک کروڑ ساٹھ لاکھ سے زیادہ ہو چکی ہے، جو امریکہ کے بعد دوسرے نمبر پر ہے
( بشکریہ : بی بی سی اردو )