لاہور کی اسسٹنٹ سپرنٹنڈنٹ آف پولیس (اے ایس پی) سیدہ شہر بانو نقوی کو پاکستان ویمن ٹیم کی ہیڈ مقرر کیے جانے کا امکان ہے۔
میڈیا رپورٹس کے مطابق پاکستان کرکٹ بورڈ (پی سی بی) نے ویمن ٹیم کی سربراہ کی تلاش شروع کری ہے جس کیلئے اے ایس پی سیدہ شہر بانو نقوی کے علاوہ سابق ڈپٹی کمشنر لاہور رافعہ حیدر بھی مضبوط امیدوار سمجھی جا رہی ہیں۔
پی سی بی کی جانب سے باقاعدہ طور پر اب تک ان خبروں کی تصدیق یا تردید نہیں کی گئی اور نہ ہی ویمن ٹیم کی سربراہ کی تعیناتی کا اعلان کیا گیا ہے۔
پی سی بی میں خواتین کرکٹ کی سربراہ کا عہدہ اس وقت خالی ہوا جب تانیہ ملک نے عہدے سے مستعفیٰ ہونے کا اعلان کیا۔
تانیہ ملک نے اکتوبر 2021 میں پی سی بی میں اپنے دور کا آغاز کیا تھا، وہ گزشتہ ماہ اکتوبر کی 30 تاریخ کو اپنے عہدے سے علیحدہ ہوئیں۔
یاد رہے کہ سیدہ شہر بانو چیئرمین پی سی بی محسن نقوی کے عبوری وزیراعلیٰ پنجاب کے دور میں عہدے پر کافی متحرک تھیں۔
شہربانو نقوی نے رواں سال فروری میں شہرت حاصل کی جب انہوں نے لاہور کے اچھرہ بازار میں گستاخی کے الزام پر ہجوم کے حملے سے ایک خاتون کو بچایا، جس نے عربی خطاطی والا لباس پہنا ہوا تھا۔
شہر بانو نقوی کو پی سی بی میں عہدہ ملنے کی خبریں سامنے آنے کے بعد کئی سوشل میڈیا صارفین سخت ردعمل کا اظہار کر رہے ہیں۔
(بشکریہ: ہنگامہ ایکسپریس)
فیس بک کمینٹ