شاہد مجید جعفری کی کتاب ’’ ڈھائی من کی عفیفہ اور مولوی مرونڈا ‘‘

ملتان ۔۔ گردو پیش پبلی کیشنز کے زیر اہتمام معروف مزاح نگار اور کالم نگار شاہد مجید جعفری کی پہلی کتاب k سے کالم ۔۔۔ ’ ڈھائی من کی عفیفہ اور مولوی مرونڈا ’ شائع ہو گئی ہے شاہد مجید جعفری گزشتہ کئی برسوں سے’’ گرد و پیش‘‘ ویب سائٹ کے لیے مزاحیہ کالم تحریر کرتے تھے اور اب ان کالموں کو کتابی صورت میں منظر عام پر لائے ہیں ۔
نام ور مزاح نگار اور کالم نگار عطااء الحق قاسمی صاحب کا کہنا ہے کہ مزاح ایک پرخطر طویل اور یکطرفہ راستہ ہے عموما اس طرف جو بھی جاتا ہے وہ واپس نہیں آ تا یا آگے سے آ گے بڑھتا چلا جاتا ہے ۔ شاہد مجید جعفری نے دلیری کے ساتھ اس راستے پر چلنے کا قصد کیا ہے ۔ یہ ہمت انہوں نے دکھائی ہے اور کتاب کی شکل میں رخت سفر بھی باندھ لیا ہے میری دعائیں ان کے ساتھ ہیں اور مجھے امید ہے کہ ان کی یہ محنت جاری رہے گی انشاءاللہ مستقبل میں ان کی شرارتیں ایک چونکا دینے والا رخ اختیار کریں گی۔ مزاح کی کسی بھی نئی کتاب کا آ نا اس بات کا ثبوت ہے کہ خدا ابھی مزاح نگاروں سے مایوس نہیں ہوا
نامور مزاح نگار گل نوخیز اختر نے لکھا کہ ہنستے مسکراتے لوگ مجھے اچھے لگتے ہیں اور اس سے بھی زیادہ وہ جو مسکراہٹ کا سبب بنتے ہیں مزاح میں مزہ سب سے بنیادی نکتہ ہے شاہد مجید جعفری اس نکتے سے آگاہ ہیں اور انہوں نے مزاح کے میدان میں اپنی پہلی کتاب کی شکل میں بھرپور انٹری دے دی ہے ۔۔
کتاب کے ناشر رضی الدین رضی نے کتاب کے پیش لفظ میں بہت تفصیل کے ساتھ شاہد مجید جعفری کی گرد و پیش کے ساتھ وابستگی کا ذکر کیا ہے ۔ رضی الدین رضی کا کہنا ہے کہ ان کالموں میں قارئین کو اچھے مزاح نگار کی سب سے بڑی خوبی بھی نظر آئے گی کہ کسی اور کو نشانہ بنانے سے پہلے اگر خود کو نشانہ بنا لیا جائے تو کاٹ ذرا کم ہو جاتی ہے اور ہدف بس تلملا کر رہ جاتا ہے انہوں نے لکھا کہ مجھے یقین ہے کہ ان کی اس نئی کتاب کا مزاح نگاروں کے حلقے میں کھلے بازوؤ ں کے ساتھ استقبال کیا جائے گا۔۔160 صفحات پر مشتمل اس کتاب کی قیمت ایک ہزار روپے ہے ۔ کتاب کے پرنٹر ناصر ظہیر ہیں جب کہ اس کی تزئین الکتاب گرافکس کے ابو میسون اللہ بخش صاحب نے کی ہے ۔
کتاب حاصل کرنے کے لیے اس نمبر پر رابطہ کیا جاسکتا ہے
03186780423