مَیں نے کئی برس پہلے ایکسپریس کے انہی صفحات پر روحی بانو کے بارے میں ایک کالم لکھا تھا کہ وہ بے خودی کے عالم میں لاہور کی سڑکوں پر مانگتی ہوئی دکھائی دیں۔ تو مجھ سے رہا نہ گیا اور مَیں نے روحی بانو کی زندگی میں ہی اُس کا مرثیہ لکھ دیا تھا۔ کہنے والے کہتے ہیں کہ روحی بانو کی یہ کیفیت 2005ءمیں اُن کے اکلوتے بیٹے علی کے قتل کے بعد ہوئی۔ جبکہ میرا خیال یہ ہے کہ اس کو پہلی مرتبہ قتل تب کیا گیا جب اُس کی پہلی شادی ناکام ہوئی۔ دوسری بار وہ تب مار دی گئی جب ایک بڑے زمیندار نے اپنی ہوس بجھا کر اسے گھر سے باہر نکال دیا۔ وہ حساس، باشعور اور تعلیم یافتہ خاتون تھیں اپنی توہین برداشت نہ کر سکی اور بیمار ہو گئی۔ کبھی وہ فاؤنٹین ہاؤس لاہور میں پائی جاتی تو کبھی کسی ہسپتال کے اُس وارڈ میں جہاں پر اُس کی تیمارداری کرنے والا کوئی نہ ہوتا تھا۔ اور کتنی تکلیف دہ یہ بات ہے کہ جب وہ مر گئی تو بے شمار لوگوں نے فیس بک پر لکھا
روحی بانو مر گئی خدا کرے یہ خبر سچی ہو
