سیستان و بلوچستان کے شہر زاہدان میں عدلیہ کی عمارت پر جیش العدل کا حملہ: نو افراد ہلاک، 13 زخمی

زاہدان : ایران کے شہر زاہدان میں جوڈیشل کمپلیکس میں ہونے والے حملے میں 9 افراد ہلاک ہو گئے جبکہ سکیورٹی فورسز کی جوابی کارروائی میں 3 دہشت گرد بھی مارے گئے۔ غیر ملکی میڈیا رپورٹس کے مطابق مسلح افراد ایران کے صوبے سیستان کے شہر زاہدان میں واقع عدالتی کمپاؤنڈ میں گھس کر ججز کے چیمبرز میں فائرنگ کرتے رہے۔
جوڈیشل کمپاؤنڈ پر دہشت گرد حملے میں نو افراد ہلاک اور 22 افراد زخمی ہوئے جبکہ سکیورٹی فورسز کی جوابی کارروائی میں 3 دہشت گرد بھی مارے گئے۔ ایرانی میڈیا رپورٹس کے مطابق جیش العدل نامی مسلح گروہ نے زاہدان میں جوڈیشل کمپلیکس پر ہونے والے حملے کی ذمہ داری قبول کر لی ہے۔
عدل میڈیا جو عسکریت پسند گروہ جیش العدل سے منسلک ٹیلیگرام چینل ہے، کا کہنا ہے کہ اس حملے کی ذمہ داری جیش العدل نے قبول کر لی ہے۔خیال رہے سیستان و بلوچستان کی سرحد پاکستان کے صوبہ بلوچستان سے ملحقہ ہے۔
ایرانی حکام کا کہنا ہے کہ ہلاک ہونے والوں میں ایک خاتون اور ایک بچہ بھی شامل ہیں۔ پاسدارانِ انقلاب کی قدس فورس کے تعلقاتِ عامہ کے دفتر نے کہا ہے کہ تین حملہ آور بھی مارے گئے۔سیستان و بلوچستان کے ڈپٹی پولیس کمانڈر کے مطابق حملہ آوروں نے ’مقامی وقت کے مطابق صبح 8:30 بجے حملہ کیا اور وہ ’سائلین کے بھیس میں‘ آئے تھے۔صوبائی پولیس اہلکار کا کہنا تھا کہ حملہ آوروں کی جانب سے کیے گئے گرینیڈ حملے کے نتیجے میں متعدد شہری ہلاک ہوئے جن میں ایک خاتون اور ایک بچہ بھی شامل ہیں۔جیش العدل نے ایک بیان میں کہا ہے کہ جس حملے کو اس نے ’بازوئے عدل‘ کا نام دیا، جو ’دو مراحل‘ میں انجام دیا گیا۔
ایرانی نشریاتی ادارے (ایس ڈی سی) نے رپورٹ کیا ہے کہ ایک حملہ آور عدالت کی عمارت کے اندر مارا گیا جبکہ دو دیگر حملہ آوروں کو سکیورٹی اور مسلح افواج کے ساتھ جھڑپ کے دوران ہلاک کر دیا گیا۔تسنیم نیوز ایجنسی نے حملے کے ایک عینی شاہد کی ویڈیو جاری کی ہے جس میں ایک خاتون کہتی ہیں کہ ’حملہ آور تین نوجوان تھے جن کی عمریں بیس کے لگ بھگ تھیں، ان کے پاس بیگ تھے اور وہ فائرنگ کرنے لگے۔‘
ایران نے اس کا الزام اسرائیل پر عائد کیا ہے تاہم اسرائیلی حکومت کی جانب سے تاحال اس حوالے سے تصدیق یا تردید سامنے نہیں آئی ہے۔سیستان و بلوچستان کے ڈپٹی پولیس کمانڈر علی رضا دلیری نے ارنا کو بتایا کہ دہشت گرد گروہ کے ارکان سائلین کے بھیس میں سنیچر کی صبح زاہدان میں عدلیہ کی عمارت میں داخل ہونے کی کوشش کر رہے تھے۔ خطرے کی نشاندہی کے بعد سکیورٹی فورسز نے فوری کارروائی کی اور جھڑپ کے دوران تینوں حملہ آوروں کو ہلاک کر دیا گیا۔
( بشکریہ : بی بی سی ۔۔ اردو )