اسلام آباد : ڈسٹرکٹ اینڈ سیشنز عدالت نے دو مقدمات میں سابق وزیر اعلیٰ خیبر پختونخوا اور پاکستان تحریکِ انصاف کے رہنما علی امین گنڈا پور کے وارنٹ گرفتاری جاری کر دیے۔
گذشتہ روز جوڈیشل مجسٹریٹ مبشر حسن چشتی نے پی ٹی آئی کے حقیقی آزادی مارچ سے متعلق دو مقدمات کی سماعت کی جس کا حکمنامہ سامنے آگیا ہے۔
عدالت کا کہنا ہے کہ علی امین گنڈا پور متعدد بار طلبی کے باوجود عدالت کے سامنے پیش نہیں ہو رہے۔
عدالت نے مقدمے کی مزید سماعت پانچ جنوری تک ملتوی کر دی۔
علی امین گنڈا پور اور دیگر کے خلاف اسلام آباد کے تھانہ بارہ کہو میں دو مقدمات درج ہیں۔
خیال رہے کہ ان مقدمات میں پی ٹی آئی کے بانی اور سابق وزیرِ اعظم عمران خان، شاہ محمود قریشی، زرتاج گل اور دیگر پی ٹی آئی رہنما بھی ان دونوں مقدمات میں نامزد تھے تاہم عدالت کی جانب سے انھیں بری کیا جا چکا ہے۔
فیس بک کمینٹ