ملتان۔(اے پی پی):فورٹ منروکے قریب کوہ سلیمان پرشدید بارشوں سے راکھی گاج کے علاقے میں پہاڑی تودے گرنے سے ٹریفک کی آمدورفت معطل ہوگئی اورفورٹ منرو کا ملک بھرسے رابطہ منقطع ہوگیا۔لینڈ سلائیڈنگ کے نتیجے میں ملتان ،ڈیرہ غازیخان،راجن پور،مظفرگڑھ اورگردونواح سے تعلق رکھنے والےہزاروں افراد اہل خانہ سمیت سات روزسے فورٹ منروکے ہوٹلوں اورنواحی سڑکوں پرپھنس گئے ہیں ،متاثرہ افراد غذائی قلت سمیت مختلف مسائل کاشکارہوچکے ہیں ۔محصور ہونے والوں میں خواتین اورشیرخواربچے بھی شامل ہیں جوفورٹ منروکے مختلف ہوٹلوں میں مقیم ہیں۔
راستہ کھولنے کے لئے این ایچ اے سمیت مختلف ادا رے ہیوی مشینری کے ذریعے کام کررہے ہیں ،لینڈسلائیڈنگ راکھی گاج سٹیل پل سمیت تین مقامات پرہوئی جس کے نتیجے میں رکنی تک گاڑیوں کی لمبی قطا ریں لگ گئیں ۔مقامی لوگوں کے مطابق ٹریفک کی قطار دونوں جانب کم وبیش بیس میل کے علاقے تک پھیلی ہوئی ہے ۔ملتان سے تعلق رکھنے والے سماجی کار کن اورکالم نگارعامرشہزاد صدیقی نےاے پی پی سے بات چیت کرتے ہوئے کہاکہ حکام نے ایک مرتبہ راستہ کھولاتھامگرشدیدبارش کے بعد مزید تودے گر نے سے سڑک پھربلاک ہوگئی ۔انہوں نے کہاکہ اے ٹی ایم کی سہولت نہ ہونے کی وجہ سے بھی مشکلات میں اضافہ ہورہاہے ۔انہوںنے بتایاکہ میری اپنی فیملی سمیت فورٹ منرو میں کم ازکم چھ فیملیاں محصورہیں ۔
دوسری جانب ٹریفک میں پھنسے ہوئے لوگوں کو بھی اس میں شامل کرلیاجائے تویہ تعداد ہزاروں تک پہنچ جاتی ہے ۔انہوں نے بتایاکہ بہت سے لوگ موٹرسائیکلوں پربھی یہاں آئے تھے اورخراب راستے کیچڑ اورتودے کے باعث ان کاکئی روز تک یہاں سے نکلنے کاامکان نہیں ۔اس کے علاوہ بلوچستان سے آنے والے ٹرکوں کی قطاریں بھی رکنی تک لگی ہوئی ہیں اوربعض ٹرک لینڈسلائیڈنگ کے دوران تباہ بھی ہوگئےہیں ۔شدید سردی اوربارشوں کے نتیجے میں ان ٹرکوں میں آنے والاسامان لائیو سٹاک بھی موت کاشکارہورہاہے ۔ٹرکوں میں موجود بھینسیں ،بکریاں اورمرغیاں بھی سردی کی تاب نہ لاکر ہلاک ہوچکی ہیں ۔انہوں نے اپیل کی کہ حکومت اس صورتحال کافوری نوٹس لے ،پاک فوج کو ہماری مددکے لئے ریسکیو آپریشن شروع کرناچاہیے اورمزید امدادی ٹیمیں بھی علاقے میں بھیجی جائیں ۔
فیس بک کمینٹ