ایک فلم بنی تھی سات لاکھ ، اس میں میر تقی میر کی غزل سلیم رضا نے گائی تھی، یار و مجھے معاف رکھو میں نشے میں ہوں۔
یہ اِنتہای دلکش غزل ہے، رشید عطرے کی موسیقی،سلیم رضا کی آواز اور میر تقی میر کا کلام تو ہے ہی انتخاب!
میں چھ سات سال کی رہی ہوں گی جب یہ فلم ہم سب نے دیکھی۔ میری خالہ جنہیں ہم خلّو کہتے ھیں، ہمراہ تھیں ۔ واپسی میں پاپا(سیّد مقصود زاہدی) ہمیں ہوٹل لے گئے جہاں میں تو آئس کریم کھا رہی تھی جب کہ بھائی جان (ڈاکٹر انور زاہدی) اور خلّو کوکا کولا پی رہے تھے، بھائی جان اور مجھ میں آٹھ سال کا فرق اور بِلکُل اتنا ہی فرق خلّو اور بھائی جان میں تھا۔
اُن دِنوں شاید کوک نئی نئی آئی ہوگی، اُوپر سے میر کی غزل کا خُمار ،وہ دونوں بوتل پیتے ہوئے ایک دوسرے سے کہئے جا رہے تھے،میں نشے میں ہوں۔۔ امی پاپا اپنی باتوں میں مگن، میری طرف کوئی متوجہ ہی نہ تھا کہ میں کیا گُل کِھلانے والی ہوں۔۔واپسی میں جب ہم پانچوں اپنی گلی میں داخِل ہوئے تو میں بھاگم بھاگ چوڑی گلی میں پہنچی،جہاں میرے نانا محلے کے بڑے بوڑھوں کے ساتھ ( یقینا ً) اخلاقیات پر گُفتگُو کر رہے ہوں گے، اور میں نے دھماکہ کیا ابّا ابّا (ہم نانا کو ابّا کہتے تھے) ہم شراب پی کر آۓ ہیں ۔۔
امی اور خلّو کے قدم اُسی تنگ گلی میں جم گئے، شُکر کہ مکان کونے کا تھا، پاپا نے جانے کس طرح بڑی گلی میں جا کر چھوٹی گلی کے دروازے سے امّی خلّو اور بھائی جان کو اندر گھر میں داخل کیا۔ مجھے کسی نے کچھ نہیں کہا ، لیکن مجھے اپنے ابّا(سیّد فصیح اُلزماں) کا جُملہ یاد ہے وہ مُسکراتے ہوئے اندر آۓ اور بولے ، لوگ کہتے ہونگے: بچے جھوٹ تھوڑی بولتے ہیں.
ابّا پاپا کے حقیقی ماموں اور انہی کی طرح روشن خیال بھی تھے اور پاپا کی آزاد خیالی، ترقی پسندی، غیر مذہبی ہونا تو مسلّمہ تھا ۔ پاپا نے ساری عمر اپنی عزت اور نیک نامی، ادب ،عِلم،انسان دوستی اور اَخلاق سے کمائی تھی ِحالانکہ یہ بیچارے دونوں حضرات تو سگریٹ کے دھوئیں سے بھی پرہیز کرتے تھے،ہاں خلّو کالج کی طالبہ ضرور تھیں اور پاپا ہمیں معیاری فلم ضرور دِکھاتے تھے،یہ ہماری سب سے بڑی آزادی تفریح اور تربیت تھی، لیکن اُس روز میں نے سب کچھ ملیا میٹ کر دیا ۔۔
یہ میر صاحب سے میرا پہلا تعارُف تھا۔۔