شدید دھند سے ملک بھر کا فلائٹ آپریشن متاثر، آج 24 پروازیں منسوخ، معمولات زندگی بھی متاثر

اسلام آباد :اسلام آباد اور پنجاب کے مختلف علاقوں میں شدید دھند کا سلسلہ جاری ہے جس کی وجہ سے فلائٹ آپریشن بھی مسلسل متاثر ہے۔
بے یقینی صورتحال کی وجہ سے آج ملک بھر کی 24 پرواز منسوخ کر دی گئیں جب کہ ملکی اور غیر ملکی 100 سے زائد پروازوں کی آمدورفت میں تاخیر ہوئی۔
اسلام آباد، سیالکوٹ اور پشاور ائیرپورٹس پر پروازوں کی لینڈنگ ٹیک آف کیلئے بے یقینی صورتحال ہے، تین روز کے دوران ملک بھر کی 88 مقامی اور بین الاقوامی پروازیں منسوخ کی جاچکی ہیں۔
دبئی سے اسلام آباد کی پی آئی اے کی پرواز کراچی میں اتاری گئی جب کہ فلائٹ شیڈول کے مطابق نجی ائیر لائن کی جدہ سے اسلام آباد کی پرواز کو لاہور لینڈ کرایا گیا۔
نجی ائیر لائن کی مسقط سے سیالکوٹ کی پرواز لاہور میں اتار دی گئی اور شارجہ سے پشاور کی پی آئی اے کی پرواز کو کراچی لینڈ کرایا گیا، اسی طرح اسلام آباد سے ابوظبی، دبئی اسلام آباد، گلگت اسلام آباد، اسکردو ، کراچی ، ابوظبی اور دبئی سے پشاور کی پی آئی اے کی پروازیں منسوخ کردی گئیں۔
دریں اثناء ملک کے زیادہ تر حصوں میں شدید دھند سے معمولات زندگی متاثر ہوگئے۔
پنجاب، خیبرپختونخوا اور بالائی سندھ کے علاقوں میں دھند کا راج برقرار ہے جب کہ راولپنڈی اور اسلام آباد میں مسلسل تیسرے روز بھی دھند ریکارڈ کی گئی ہے، دھند کی وجہ سے موٹروے ایم 2 اسلام آباد سے بلکسر تک بند کردی گئی۔
ادھر پشاور سے اسلام آباد تک موٹر وے پر بھی ٹریفک معطل ہے اور ملتان سکھر موٹروے پنول عاقل سے روہڑی تک بند کردی گئی ہے۔
اس کے علاوہ دھند کی وجہ سے سوات ایکسپریس وے اور ہزارہ ایکسپریس وے کے مختلف سیکشن بھی ٹریفک کیلئے بند کردیے گئے ہیں۔
(بشکریہ: جیو نیوز)