ملتان: شہرہ آفاق نظم ”اسے کہنا دسمبر آگیاہے“ سمیت کئی خوبصورت نظموں اور افسانوں کے خالق نامور ماہر تعلیم ، افسانہ نگار اور شاعرپروفیسر عرش صدیقی کی 27ویں برسی آج 8اپریل کو منائی جارہی ہے۔
عرش صدیقی کااصل نام ارشاد الرحمن تھا۔ وہ 21جنوری1927ءکو گورداسپور (بھارت)میں پیداہوئے۔ گورنمنٹ ہائی سکول گڑگاﺅں سے میٹرک کیا۔گورنمنٹ کالج لدھیانہ سے ایف اے کے بعد لاہور آگئے اور بی اے کی ڈگری حاصل کی۔انہوں نے پاکستان ریلوے میں ٹکٹ چیکر کی حیثیت سے ملازمت شروع کی اورپھر ایم اے انگریزی کے بعد محکمہ تعلیم سے وابستہ ہوگئے۔
آپ نے ملتان میں رائٹرز گلڈکے بانی ممبر اور سیکرٹری کی حیثیت سے کام کیا اور اردو اکادمی کی بنیاد رکھی۔افسانوں، غزلوں، نظموں ، دوہوں سمیت مختلف موضوعات پر آپ کی 10کتب شائع ہوئیں جن میں افسانوں کے مجموعے کو آدم جی ایوارڈ ملا۔ وہ8اپریل 1997ءکو کینسر کے باعث انتقال کرگئے تھے۔
فیس بک کمینٹ