لاہور : معروف صحافی اور اردو ڈائجسٹ کے بانی الطاف حسن قریشی ہفتہ 15 مئی کو لاہور میں انتقال کر گئے۔ان کی عمر 94 برس تھی ۔
الطاف حسن قریشی تین مارچ 1932 کو حصار میں پیدا ہوئے ۔1947 میں قیامِ پاکستان کے بعد وہ ہجرت کر کے لاہور آ گئے اور عملی زندگی کا آغاز کیا ۔
وزیراعظم شہباز شریف نے معروف صحافی اور اردو ڈائجسٹ کے بانی الطاف حسن قریشی کے انتقال پر اظہار افسوس اور دعائے مغفرت کی ہے ۔
وزیراعظم نے کہا کہ الطاف حسن قریشی کے انتقال سے صحافت کے شعبے میں ایسا خلا پیدا ہوگیا ہے جو شاید ہی کبھی پر ہوسکے، ان کی صحافت کی دنیا میں بے پایاں خدمات کو رہتی دنیا تک یاد رکھا جائے گا۔
اے پی این ایس کی جانب سے جاری بیان میں اردو ڈائجسٹ کے چیف ایڈیٹر الطاف حسن قریشی کے انتقال پر افسوس کا اظہار کیا گیا اور کہا گیا کہ ان کے انتقال سے صحافتی اور ادبی دنیا غم زدہ ہے۔
رپورٹ کے مطابق الطاف حسن قریشی کی نماز جنازہ 17 مئی (اتوار) کو بعد نماز ظہر جامعیہ اشرفیہ لاہور میں ادا کی جائے گی۔
الطاف حسن قریشی نے اردو ڈائجسٹ کے ذریعے ملک بھر میں سنجیدہ صحافت، دانش ورانہ مباحث اور ادبی اقدار کے فروغ کے لیے تاریخی اور غیرمعمولی کردار ادا کیا۔
مرحوم الطاف حسن قریشی کی تصنیفات میں ملاقاتیں، مقابل ہے آئینہ، چھ نکات کی سچی تصویر، نوکِ زباں، مشرقی پاکستان اور مشرقی پاکستان ٹوٹا ہوا تارا سمیت دیگر کتابیں شامل ہیں۔
مرحوم کی صحافتی خدمات پر 2019 میں الطاف صحافت کے نام سے کتاب شائع ہوچکی ہے۔
( بشکریہ : جیو نیوز )
فیس بک کمینٹ