پچھلے ہفتے بہت سی باتیں ہوئیں اور سب ہی سنانے کو جی چاہتا ہے۔امریکہ جو ہمارا محبوب بھی ہے اور دشمن جاں بھی، جہاں پہنچنے کو ہر کسی کا جی چاہتا ہے مگر گالی بھی اسی کو دی جاتی ہے۔ عجیب محبت و نفرت کا رشتہ ہے۔
پچیس تیس برس پہلے پاکستانی عوام ان ممالک میں شامل تھے جو ویزا لاٹری میں درخواست ڈال سکتے تھے۔ سچ پوچھیے تو لاٹری وغیرہ پہ یقین کچھ کم ہی تھا کہ ہمارا کبھی چار پیسے کا انعام نہیں نکلا کجا امریکی ویزا اس لئے درخواست ڈالنے کی زحمت ہی گوارا نہ کی۔ چونکے اس دن جب صاحب کے کزن نے بوریا بستر لپیٹا یہ کہتے ہوئے کہ لاٹری میں نام آ گیا ہے۔
بہت لوگ امریکہ گئے، وہاں آباد ہوئے مگر امریکہ جانے کا مطلب یہ نہیں تھا کہ اپنی اولاد کو امریکی بننے کی چھوٹ دے دی جائے، خاص طور پہ بیٹیوں کو۔ بھلے وہ امریکی سکول جائیں، امریکی بچوں کے ساتھ پڑھیں، دن رات اس کلچر میں رہیں مگر صاحب ان کا رہن سہن طور طریقہ اماں ابا کے آبائی وطن جیسا ہی ہونا چاہیے۔ اماں ابا کیوں پروا کریں کہ سکولز میں ساتھی بچے ان کا مذاق اڑاتے ہیں، اکیسویں صدی میں رہتے ہوئے پچھلی صدی میں زندگی بسر کرنے کی جستجو، پاگل پن ہی تو ہے۔
ہم میں سے بہت سے لوگ یہ نہیں جانتے کہ ٹین ایج سے گزرتا بچہ طبعی طور پہ اپنے ہوش و حواس میں نہیں ہوتا۔ نہ وہ بچہ ہے اور نہ بڑا۔ بیچ میں کہیں جھولتا ہوا، تبدیلی کے پل سے گزرتا بچہ کس قدر خوفزدہ اور شکوک و شبہات کا شکار ہے، یہ کوئی نہیں جان پاتا۔ اور اگر یہ بچہ ایشیائی ہو تو مرے پہ سو درے۔ ایشیائی ماں باپ کی خونخوار نظریں، دن رات کی نصیحتیں، بچوں کو بدیس سے واپس دیس لے جانے کی ترکیبیں، جلد از جلد نکاح پڑھوانے کے منصوبے تاکہ ان کی لڑکی کہیں ویسی امریکی نہ بن جائے جنہیں دیکھ کر وہ لاحول پڑھتے ہیں۔ ناسمجھ لوگ، پودا بدیسی زمین میں لگا کر چاہتے ہیں کہ پھل دیسی آئے۔ ایک اور ستم ظریفی یہ کہ بیٹوں کی طرف سے آنکھ بند کر لی جاتی ہے کہ غیرت وغیرہ کا مسئلہ نہیں ہوتا مگر بیٹیوں کی طرف سے چوکنی آنکھیں مزید کھول لی جاتی ہیں کہ کہیں کوئی پرندہ بھی نہ پر مارے۔
یہ تمہید کیوں باندھی گئی ہے وہ تو ہم بعد میں بتائیں گے پہلے یہ سن لیں کہ پچھلے ہفتے نیٹ فلیکس پہ adolescense نامی ڈرامہ ریلیز ہوا جس نے سب والدین کے پاؤں نیچے سے زمین نکال دی۔ تیرہ سالہ بچہ اپنی ہی عمر کی کلاس فیلو لڑکی کو قتل کر دیتا ہے۔ وجہ ٹین ایج بچوں میں رونما ہونے والی جنسی تبدیلیاں، خود کو نا اہل سمجھنے کی غلط فہمی، ساتھی بچوں کی طرف سے تضحیک، تحقیر اور مذاق، سوشل میڈیا ایپس اور استعمال ہونے والے وہ اشارے اور زبان ہیں جو میں اور آپ سمجھ ہی نہیں سکتے۔ جب سمجھ نہیں سکتے تو بچوں کو سمجھا کیا سکتے ہیں؟ قتل کی تحقیق کرنے والے پولیس افسر کو جب قتل کرنے کی وجہ ڈھونڈنے میں ناکامی ہوتی ہے تو اس کی مدد کرنے کے لیے اسی کا ٹین ایجر بیٹا سامنے آتا ہے جو باپ کو اُدھر اُدھر سر پٹختے دیکھ کر جان چکا ہے کہ ہماری دنیا کی بات باپ کی سمجھ میں آنے والی نہیں چاہے وہ Detective ہی کیوں نہ ہو۔
سوچیئے برطانوی پولیس افسر ان اشاروں کی زبان نہیں سمجھتا تو ہم اور آپ کس کھیت کی مولی ہیں؟
اکیسویں صدی کے اس دور میں سوشل میڈیا، انٹرنیٹ اور مختلف گیجٹس نے پوری دنیا کی نئی نسل کو آپس میں جوڑ تو دیا ہی ہے لیکن وہ ایک نئی دنیا میں بھی داخل ہو گئے ہیں جس کے متعلق والدین کچھ نہیں جانتے۔ کسی سے بھی کچھ چھپا ہوا نہیں اور کوئی بھی کچھ بھی دیکھ سکتا ہے۔ مختلف گھروں / کلچر / معاشروں سے تعلق رکھنے والے بچوں کے لیے تو یہ اور بھی مشکل ہے کہ گھر کے بڑوں کا پریشر بھی برداشت کریں اور باہر کے ساتھیوں کا طعن و تشنیع بھی۔
لمحہ فکریہ ہے لیکن کیا کیا جائے؟ جدید دنیا کے آندھی کی مانند بدلتے تقاضوں سے بچے تو بوکھلائے ہوئے ہیں ہی، ساتھ میں جاہل والدین نے زندگی مزید مشکل بنا دی ہے۔ لیکن کیا اس کا حل یہ ہے کہ بچوں کو موت کے گھاٹ اتار کر سمجھا جائے ہم پُگ گئے اور عزت بچ گئی۔ ایسا کرنے والے کو احمقوں کی جنت کا باسی ہی سمجھا جا سکتا ہے۔لیکن کیا کریں وطن عزیز سے اٹھ کر ایسے بے شمار احمق دنیا بھر میں اپنی جنت بنا چکے ہیں جنہیں رہائش کے لیے تو جدید دنیا چاہیے مگر لوازمات پچھلی صدی والے۔ جس میں بیٹی کو نکیل ڈال کر بھیڑ بکری کی طرح ہانکا جاتا تھا۔ وقت پہ چارہ، ادھر ادھر جانے کی پاداش میں ہاتھ میں پکڑی سوٹی کا بے دریغ استعمال اور ضرورت پڑنے پہ قربانی۔
لیکن ہوا کا رخ بدلنے کے ساتھ ساتھ جدید دنیا کی بچی کو علم ہے کہ وہ دوسرے درجے کی شہری نہیں۔ جتنی ڈھیل اس کے بھائی کو دی جاتی ہے وہ بھی اسی کی مستحق ہے۔آغاز میں ہم نے جو تمہید باندھی تھی، اس کی طرف آتے ہیں۔
نیویارک میں پیدا ہونے والی پاکستانی ماں باپ کی چودہ سالہ بیٹی پاکستان واپس لا کر قتل کر دی جاتی ہے۔ پچیس برس پہلے پاکستانی باپ امریکی لاٹری کے ذریعے امریکہ پہنچا، ٹیکسی ڈرائیونگ سے روزی کمائی، تین بیٹیوں کا باپ بنا اور پھر یاد آ گیا کہ اس کی خاندانی روایات کے مطابق لڑکیوں کو اس قدر ڈھیل نہیں دی جا سکتی۔
بیٹی کا ٹک ٹاک اکاؤنٹ ابا کو پسند نہیں آیا، بیٹی اکاؤنٹ بند کرنے پہ راضی نہیں ہوئی سو اس کا حل یہ نکالا گیا کہ اس بچی کو اگلی دنیا روانہ کر دیا جائے۔ زمینی خداؤں کی غیرت کے بھی کئی تقاضے ہوتے ہیں جن میں سب سے اہم بیٹیوں اور بہنوں کو موت کے حوالے کرنا ہے۔
نیویارک میں رہتے ہوئے تو یہ ممکن نہیں سو بچی کو پاکستان گھمانے کے بہانے لایا جاتا ہے گھومنا پھرنا، شاپنگ کروانا۔ بچی بے انتہا خوش نظر آتی ہے اور اس تفریح کی تصویریں و وڈیوز اپنے امریکی دوستوں کو بھیج کر بتاتی ہے کہ وہ کس قدر خوش ہے۔ غالباً ابا بیٹی کو قربان کرنے سے پہلے دنیا / خاندان کو یہ امپریشن دینا چاہتا تھا کہ اسے بیٹی سے کس قدر محبت ہے۔ اس مصنوعی محبت کے ساتھ ساتھ وہ بچی کے ماموں سے مل کر بچی کو قتل کرنے کا منصوبہ بناتا ہے۔ سنگدلی کی انتہا دیکھیے کہ دو مرد، باپ اور ماموں، چودہ برس کی بچی کو قتل کرنے کے منصوبے تیار کر رہے ہیں اور بچی باپ اور ماموں کے ساتھ خوشی اور اعتماد سے دن گزار رہی ہے۔ آخر ڈکیتی کا رنگ دیتے ہوئے بچی کو دن دیہاڑے گولی مار دی جاتی ہے اور بچی باپ کو پکارتے پکارتے مر جاتی ہے یہ جانے بغیر کہ وہی اس کا قاتل ہے۔
نیویارک ٹائمز نے حرا کی کہانی سیاق و سباق کے ساتھ لکھی ہے۔ اور ایک ایسے وقت میں جب پاکستانیوں کو امریکی ویزا دینے کی مخالفت کی جا رہی ہے۔ حرا کے متعلق سوچتے ہوئے ہم یہی کہہ سکتے ہیں کہ شاید ایسا کرنا ٹھیک ہی ہے۔اگر والدین بیٹیوں کو غاروں کے زمانے میں رہ کر پروان چڑھانا چاہتے ہیں تو پھر امریکہ جانے کی کیا ضرورت؟ دیس ہی بھلا، جہاں جب چاہیں خود گردن اتاریں، جب چاہیں کسی اور ظالم کے حوالے کر کے مونچھوں پہ تاؤ دیتے ہوئے اپنی غیرت کے قصے سنائیں چاہے غیرت کی بنیادوں میں بے شمار عورتوں کا لہو کیوں نہ ہو۔
( بشکریہ : ہم سب ۔۔ لاہور )
فیس بک کمینٹ