لاہور : فٹ بال کے بین الاقوامی نگراں ادارے فیفا کی جانب سے پاکستان فٹ بال فیڈریشن (پی ایف ایف) کے معاملات میں ’بیرونی مداخلت‘ پر پاکستان کی رکنیت معطل کر دی گئی ہے۔
پاکستان فٹ بال فیڈریشن کی معطلی کی وجہ ’پی ایف ایف ہیڈ کوارٹر‘ پر قبضہ بنی۔ فیفا کا کہنا ہے کہ پاکستان فٹ بال فیڈریشن نارملائزیشن کمیٹی کو اختیارات کی واپسی تک پاکستان کی رکنیت معطل رہے گی۔ فیفا نے پاکستان فٹ بال فیڈریشن کی معطلی کا سبب یہ بتایا ہے کہ کسی بھی قسم کی بیرونی مداخلت فیفا قواعد وضوابط کے تحت قابل قبول نہیں ہے۔
فیفا کا کہنا ہے کہ پاکستان فٹ بال ہیڈ کوارٹر پر قبضہ فیفا کے قواعد وضوابط کی سنگین خلاف ورزی ہے۔ پاکستان کی فٹبال پچھلے دنوں اس وقت نئے تنازع سے دوچار ہوئی جب پاکستان فٹ بال فیڈریشن سے وابستہ ایک گروپ نے، جس کے سربراہ اشفاق حسین شاہ ہیں، لاہور میں پاکستان فٹ بال ہاؤس کا کنٹرول حاصل کر کے فیفا کی مقرر کردہ نارملائزیشن کمیٹی کے سربراہ ہارون ملک کو وہاں سے باہر کر دیا اور فٹبال کے معاملات خود سنبھال لیے۔
فیفا نے واضح کر دیا ہے کہ یہ معطلی اس وقت ختم کی جائے گی جب اس کی مقرر کردہ نارملائزیشن کمیٹی تحریری طور پر اسے مطلع کرے گی کہ ہیڈکوارٹر کا انتظام، اکاؤنٹس اور رابطے کے تمام ذرائع اس کے (کمیٹی) حوالے کیے جا چکے ہیں۔ خیال رہے کہ فیفا نے پاکستانی فٹ بال میں گذشتہ دنوں پیدا ہونے والے تنازع کے بعد پاکستان فٹ بال ہیڈ کوارٹر پر ’قبضہ‘ ختم کرنے کے لیے 31 مارچ کو آٹھ بجے شب کی ڈیڈ لائن دی تھی اور یہ واضح کر دیا تھا کہ اگر اسے خالی کر کے فیفا کی مقرر کردہ نارملائزیشن کمیٹی کے حوالے نہ کیا گیا تو پھر فیفا کے قواعد و ضوابط کے تحت اس معاملے کو دیکھا جائے گا جس میں رکنیت کی معطلی قابل ذکر ہے۔ فیفا نے قبضے کے اس اقدام کو اپنے اصولوں کی خلاف ورزی گردانتے ہوئے یہ واضح کر دیا تھا کہ پاکستان میں اس وقت فیفا کی نمائندہ حیثیت ہارون ملک کی سربراہی میں قائم نارملائزیشن کمیٹی کو حاصل ہے۔
( بشکریہ : بی بی سی اردو )
فیس بک کمینٹ