اسلام آباد: اسپیکر قومی اسمبلی ایاز صادق کے بیان پر پی ٹی آئی چیئرمین بیرسٹر گوہر کا ردعمل سامنے آگیا۔
پی ٹی آئی چیئرمین بیرسٹر گوہر نے کہا کہ پہلے بھی کہا تھا اب بھی کہہ رہے ہیں کہ اسپیکر آفس سے کوئی دعوت نامہ نہیں ملا، اسپیکر نے کسی ایونٹ کی دعوت نہیں دی۔
یاد رہے کہ ترجمان قومی اسمبلی کا کہنا ہے کہ ہفتے کی رات کو اسپیکر قومی اسمبلی نےامریکی وفد کے اعزاز میں عشائیہ دیا تھا جس میں بیرسٹرگوہر اور عامر ڈوگر کو شرکت کی دعوت دی گئی تھی۔
ترجمان قومی اسمبلی کے مطابق دونوں معزز ارکان نے دعوت قبول کی اور شرکت بھی کنفرم کی لیکن ملاقات اور عشائیہ میں شرکت نہیں کی، دعوت نہ دینے کی بات حقائق کے برعکس ہے۔
دوسری جانب اسپیکر قومی اسمبلی ایاز صادق کا کہنا ہے کہ پاکستان کے دورے پر آئے امریکی ارکانِ کانگریس نے بانی پی ٹی آئی کا ذکر تک نہیں کیا، وہ اسے پاکستان کی اندرونی سیاست گردانتے ہیں۔
پی ٹی آئی کو عشائیے کی دعوت پر ایاز صادق نے بتایا کہ عشائیے کی دعوت بیرسٹر گوہر اور عامر ڈوگر کو دی تھی جس کا ثبوت موجود ہے، پی ٹی آئی کی پارلیمانی لیڈر زرتاج گُل کہہ چکی ہیں کہ عامر ڈوگر کو اسپیکر نے دعوت نامہ بھیجا تھا، وہ ذاتی مصروفیت کے باعث پارٹی ارکان کو اس سے آگاہ نہیں کرسکے۔
(بشکریہ:جیونیوز)
فیس بک کمینٹ