یہ 6 ستمبر 1975ءکا دن تھا جب علی الصبح ملتان شہر سمیت پورے سرائیکی وسیب کے لوگوں کو ایک نئے اخبار ”آفتاب “کی آمد کا انتظار تھا جب اخبار مارکیٹ میں آیا تو ہاتھوں ہاتھ فروخت ہوا اللہ تعالیٰ سینئر صحافی چیف ایڈیٹر ممتاز احمد طاہر ایڈیٹر، عزیز انجم کو صحت والی لمبی زندگی عطاءکریں انہوں نے سرزمین اولیاءمیں جو پودا لگایا تھا وہ الحمداللہ ایک تن آور درخت بن چکا ہے اور جناب عزیز انجم کے امریکہ منتقل ہونے کے بعد اسد ممتاز( گروپ ایڈیٹر )اور محسن ممتاز( ایڈیٹر)اپنے والد بزرگوار اور میرے حقیقی ماموں ممتاز احمد طاہر کے قدم سے قدم ملاکر نہ صرف ملتان بلکہ لاہور اور کراچی سے بھی روزنامہ آفتاب کی مسلسل اشاعت کا سفر جاری رکھے ہوئے ہیں میں بھی اس سفر میں ایک ادنیٰ کارکن کی حیثیت سے شریک ہوں
5ستمبر 1975ءکو ممتاز احمد طاہر کی ہدایت پر لاہور گیا اور اردو ڈائجسٹ سے آفتاب کا کلر ایڈیشن شائع کراکے جی ٹی ایس کی بس پر ملتان پہنچا یہ سفر بڑا دلچسپ تھا اس سفر کو کسی اور وقت میں قلم بند کروں گا البتہ پہلا ایڈیشن بہت خوبصورت تھا روزنامہ آفتاب نے ہمیشہ حق اور سچ کا پرچم سر بلند رکھا کسی کی بلاوجہ پگڑی نہیں اچھالی اور مثبت صحافت کو فروغ دیا اس ادارے سے جناب شمس ملک مرحوم،جناب باسم میواتی مرحوم،جناب سعید کوثر مرزا مرحوم،جناب مظہر کلیم ایم اے ایڈووکیٹ مرحوم،جناب مقبول عباس کاشر مرحوم،جناب انور امروہی مرحوم،جناب چوہدری نذیر احمد مرحوم،پروفیسر اطہر ناسک مرحوم،پروفیسر ڈاکٹر اختر شمار مرحوم،ملک سلطان مرحوم،آفتاب خان مرحوم،احمد حسن اویسی مرحوم اور مختلف شعبہ جات میں نامور شخصیات نے کام کیا اخبار کی ابتداءکتابت سے ہوئی اور اب الحمداللہ جدید کمپیوٹرائزڈ نظام سے آراستہ ہے روزنامہ آفتاب کے 48سال بہت سی یادیں سمیٹے ہوئے ہیں ویسے تو اتارچڑھاﺅ زندگی کا حصہ ہوتا ہے اصل میں ممتاز احمد طاہر اور ہمارے خاندان کی عقیدت ہمیشہ سے غوث پاکؒ سے رہی ہے یہی وجہ ہے کہ ہمارے پیرومرشد حضرت سید احمد سعید کیقباد شاہ بخاری ؒ نے جب اخبار کی رسم بسمہ اللہ میں دعا کروائی تو فرمایا کہ یہ غوث پاک ؒ کا اخبار ہوگا چنانچہ یہ حقیقت ہے کہ بزرگوں کی دعاﺅں سے ”آفتاب“ اپنی مسلسل اشاعت جاری رکھے ہوئے ہے۔
1977ءکی تحریک نظام مصطفی ﷺ میں اخبار کی اشاعت روزانہ ایک لاکھ سے تجاوز کر گئی اور ملتان کا اخبار اسی روز کراچی سمیت ملک کے دوردراز علاقوں میں بھی فروخت ہوتا تھا روزنامہ آفتاب کو یہ اعزاز بھی حاصل ہے کہ اس کے صفحات پر پہلی مرتبہ ملتان،ڈیرہ غازی خان ڈویژن کے طلباءوطالبات کا میٹرک کا مکمل رزلٹ شائع کیا گیا، تحریک نظام مصطفی ﷺ کے دوران جناب ممتاز احمد طاہر اور جناب عزیز انجم سمیت دیگر سٹاف کے خلاف 16ایم پی او کا مقدمہ درج ہوا تو ملتان کے تمام صحافیوں نے احتجای ریلی نکالی جسے وکلاء،سیاسی وسماجی کارکنوں اور تاجروں نے بہت زیادہ پزیرائی دی اور آخر کار مقدمہ خارج ہوا اس دوران پولیس کے مسلسل چھاپوں کے باوجود اخبار کی اشاعت میں ایک دن بھی رکاوٹ نہیں آئی روزنامہ آفتاب کی اشاعت کا آغاز پل شوالہ کے قریب ایک کرائے کی عمارت سے ہوا اور آج الحمداللہ آفتاب اخبار کا دفتر باغ لانگے خاں کے قریب اپنی عمارت میں موجود ہے جہاں جدید ترین پرنٹنگ پریس بھی موجود ہے بہر حال وقت تیزی سے گزررہا ہے اخبار کی اشاعت کا آغاز تو کل کی بات لگتی ہے لیکن الحمداللہ 48سال کا سفر گزر چکا ہے آج 6ستمبر 2022ءکے دن خواہش تھی کہ اخبار کی سالگرہ کا اہتمام دھوم دھام سے کیا جائے مگر ممتاز احمد طاہر ،اسد ممتاز اور محسن ممتاز کی مشاورت کے بعد فیصلہ کیا گیا ہے کہ ہم آفتاب اخبار کی 48ویں سالگرہ سیلاب زدگان کے نام کرتے ہیں ہم سالگرہ انتہائی سادگی اور سیلاب متاثرین کی بحالی کی دعاﺅں کے ساتھ منائیں گے اور جیسے ہی سیلاب زدگان کی بحالی ہوگی تو سالگرہ کے حوالے سے آفتاب کی رنگین اشاعت کا اہتمام کیا جائے گا دعا ہے کہ اللہ تعالیٰ ممتاز احمد طاہر صاحب کو صحت والی لمبی زندگی عطا فرمائیں اور آپکی ادارت میں آفتاب ہر روز طلوع ہوتا رہے۔ (آمین)
فیس بک کمینٹ