اقبال سراج نے ن لیگ کا ٹکٹ دو کروڑ میں خریدا ؟ ۔۔ صہیب اقبال

مسلم لیگ ن نے صوبائی اسمبلی کے حلقہ 219 میں رانا اقبال سراج کو ٹکٹ دیا۔ 2013 کے انتخابات میں اس حلقہ سے مسلم لیگ ن کے ٹکٹ پر رائے منصب علی جیتے لیکن اس بار ٹکٹ نہ ملنے پر وہ پاکستان پیپلز پارٹی کی ٹکٹ پر امید وار ہیں۔اس حلقے میں رانا اقبال سراج مسلم لیگ ن، ڈاکٹر اختر ملک پاکستان تحریک انصاف جبکہ رائے منصب علی پاکستان پیپلز پارٹی کے امیدوار ہیں۔ رائے منصب علی نے گفتگو کرتے ہوئے کہا کہ ن لیگ نے ایک جعلی کھاد بنانے والے کو ٹکٹ دیا یہ ٹکٹ اس حلقے کے مسلم لیگ ن کے ایم این اے عبدالغفار ڈوگر نے دو کروڑ لے کر دیا۔رانا اقبال سراج ایک غیر معروف ن لیگی رہنما ہیں۔ وہ گزشتہ انتخابات میں مسلم لیگ ن کے ایم این اے عبدالغفار ڈوگر کی انتخابی مہم کے اخراجات برداشت کرتے تھے اس بار عبدالغفار نے صوبائی اسمبلی کا ٹکٹ ہی رانا اقبال سراج کو دیا۔29 جولائی کو محکمہ زراعت کی ٹیم نے مسلم لیگ ن کے صوبائی اسمبلی کے امیدوار رانا اقبال سراج کے کھاد کے گودام پر چھاپہ مارا۔ جس پر رانا اقبال سراج نے مزاحمت کی۔ میڈیا کو بیان دیا کہ حساس اداروں نے انہیں بلایا اور کہا کہ مسلم لیگ ن کی ٹکٹ پر انتخابات مت لڑیں یہ بھی الزام لگایا کہ ان پر حساس اداروں نے تشدد کیا ہے جس پر نواز شریف نے لندن سے بیان دیا کہ ان کے امیدواروں کو ہراساں کیا جاتا ہے جس کی وجہ سے مسلم لیگ ن کے امیدوار ملک بھر میں پریشان ہیں۔30 جون کو رانا اقبال سراج نے ویڈیو پیغام بھیجا کہ وہ غلط فہمی کا شکار ہوا اس کے گودام پر چھاپہ حساس اداروں نے نہیں بلکہ محکمہ زراعت نے مارا وہ اپنا الزام واپس لیتے ہیں۔ رانا اقبال سراج نے کہا کہ وہ غلط فہمی کا شکار ہو گئے تھے تاہم پہلا بیان پریشانی کے عالم میں دیا جس پر شرمندہ ہوں۔’میں اپنے ملکی اداروں کی دل سے عزت کرتا ہوں. اپنا تردیدی بیان بھی دیا ہے۔ اب انتخاب میں بھرپور مہم چلاؤں گا۔’محکمہ زراعت کے سینئر افسر نے نام نہ ظاہر کرنے پر بتایا کہ رانا اقبال سراج عرصہ دراز سے جعلی کھاد تیار کر رہا ہے اس کے حوالے سے سپیشل برانچ پولیس نے بھی ماضی میں رپورٹ کی لیکن اس وقت اس علاقے کے ایم این اے عبدالغفار ڈوگر کارروائی سے روک دیتے تھے تاہم اب نگران حکومت ہے اب کسی قسم کا دباؤ نہیں تو کارروائی کی ہے۔ رانا اقبال سراج جعلی کھاد پورے جنوبی پنجاب میں سپلائی کرتا ہے اس کا کل کاروبار ڈیڑھ ارب روپے کے لگ بھگ ہے۔رانا اقبال سراج کے الزامات اور تردیدی بیان کے حوالے سے ہم نے شاہ محمود قریشی سے بات کی تو ان کا کہنا تھا کہ رانا اقبال سراج کے تردیدی بیان نے نواز شریف کے بیان کی تردید کر دی، مسلم لیگ ن کو چاہیے کہ ایسے امیدوار سے ٹکٹ واپس لے اور کارروائی کرے اور میاں صاحب بھی اپنا بیان واپس لیں۔انہوں نے مزید کہا کہ تحریک انصاف نہیں بلکہ ملک کا کوئی بھی شہری پاک فوج کیخلاف چھوٹا پروپیگنڈا برداشت نہیں کرے گا۔دوسری طرف الیکشن کمیشن نے بھی صورتحال کا نوٹس لے لیا اور متعلقہ حکام کو تحفظ فراہم کرنے کا کہا ہے۔
( بشکریہ :لوک سجاگ )