پشاور:پشاور ہائیکورٹ نے دنیا بھر میں مشہور لپ سنکنگ ایپ ٹک ٹاک کو آج سے بند کرنے کا حکم دے دیا ہے۔
ٹک ٹاک کے خلاف دائر درخواست پر سماعت پشاور ہائیکورٹ میں ہوئی۔
ڈائریکٹر جنرل پی ٹی اے، ڈپٹی اٹارنی جنرل اور درخواست گزار کے وکیل نازش مظفر اور سارہ علی عدالت میں پیش ہوئے۔
دوران سماعت چیف جسٹس پشاور ہائیکورٹ قیصر رشید خان نے ریمارکس دیے کہ ٹک ٹاک پر جو ویڈیوز اپ لوڈ ہوتی ہیں یہ ہمارے معاشرے کو قابل قبول نہیں ہے۔
جسٹس قیصر رشید خان کا کہنا تھا ٹک ٹاک ویڈیوز سے معاشرے میں فحاشی پھیل رہی ہے اس کو فوری طور پر بند کیا جائے۔
چیف جسٹس پشاور ہائیکورٹ نے ڈی جی پی ٹی اے سے استفسار کیا کہ کیا ٹک ٹاک ایپلیکیشن بند کرنے سے ان کو نقصان ہو گا؟ جس پر ڈی جی پی ٹی اے نے جواب دیا جی ہاں نقصان ہوگا۔
ڈی جی پی ٹی اے کا کہنا تھا ہم نے ٹک ٹاک کے عہدیداروں کو درخواست دی ہے لیکن ابھی مثبت جواب نہیں آیا۔
چیف جسٹس پشاور ہائیکورٹ کا کہنا تھا جب تک ٹک ٹاک کے عہدہ دار آپ کی درخواست پر عمل نہیں کرتے، غیر اخلاقی مواد روکنے کے لیے آپ کے ساتھ تعاون نہیں کرتے، اس وقت تک ٹک ٹاک بند کر دی جائے۔
(بشکریہ: جیونیوز)
فیس بک کمینٹ