فیصل آباد : بلوچستان سے تعلق رکھنے والے سینئر سیاست دان اور قوم پرست رہنما ڈاکٹر عبدالحی بلوچ جمعہ کےروز ٹریفک حادثے میں جاں بحق ہو گئے۔ ان کی عمر 76 برس تھی ۔
قریبی عزیز نادر چھلگری کا کہنا ہے کہ ممتاز قوم پرست سیاستدان ڈاکٹرعبدالحئی بہاولپور کے قریب کوئٹہ سے لاہور جاتے ہوئے ٹریفک حادثہ میں جاں بحق ہوئے، وہ نیب، بلوچستان نیشنل موومنٹ اور نیشنل پارٹی سے وابستہ رہے۔
ڈاکٹر عبد الحئی بلوچ کی میت بہاولپور سے ان کے آبائی علاقے بھاگ کے لیے روانہ کر دی گئی ہے۔وزیر اعلیٰ بلوچستان سمیت مختلف شخصیات نے ڈاکٹر عبد الحئی بلوچ کے انتقال پر افسوس کا اظہار کیا ہے۔دوسری طرف وزیر اعلیٰ پنجاب سردار عثمان بزدار نے کہا ہے کہ ڈاکٹر عبد الحئی بلوچ کی حادثے میں ناگہانی وفات پر صدمہ ہوا ہے۔
سابق صدر آصف علی زرداری کا کہنا تھا کہ ڈاکٹر عبدالحی کی جمہوریت اور بلوچستان کے عوام کیلئے خدمات ناقابلِ فراموش ہیں، انہوں نے ڈاکٹر عبدالحی کیلئے مغفرت اور بلند درجات کیلئے دعا کی۔