نئے آرمی چیف اور جوائنٹ چیف آف سٹاف کمیٹی کے تعیناتی کیلئے سمری بجھوادی:ڈی جی آئی ایس پی آر

لپنڈی:ڈی جی آئی ایس پی آر میجر جنرل بابر افتخار نے ٹوئٹراکاؤنٹ سے کنفرم کردیا ہے کہ جی ایچ کیو کی جانب سےنئے آرمی چیف اور چیف آف سٹاف کمیٹی کی تعیناتی کے لئے ناموں کی سمری وزارت دفاع کو بھجوادی ہے،ڈی جی آئی ایس پی آر کی طرف سے جاری کردہ ٹویٹ میں کہا گیا ہے کہ6سینئر موسٹ جرنیلوں کی سمری وزارت دفاع کو بھیج دی گئی ہے۔واضح رہے کہ اس سے قبل وزیر دفاع خواجہ آصف اور وزیر برائے اطلاعات مریم اورنگزیب نے کہا تھا کہ ابھی تک کوئی سمری موصول نہیں ہوئی۔
دوسری طرف وزیراعظم میاں شہباز شریف نے کابینہ کا خصوصی اجلاس جمعرات کو طلب کر لیا۔ وفاقی کابینہ کا خصوصی اجلاس یک نکاتی ایجنڈے پر طلب کیا ہے۔ اجلاس صبح 9 بجے وزیر اعظم ہاؤس میں ہوگا۔اس سے قبل وزیراعظم شہباز شریف اور وفاقی وزیر دفاع خواجہ آصف کے درمیان ملاقات ہوئی، ملاقات کے دوران معاون خصوصی ملک احمد خان بھی موجود تھے۔ اس ملاقات میں آرمی چیف کی تعیناتی پر بھی تبادلہ خیال کیا گیا۔
اس ملاقات کے بعد سابق صدر آصف علی زرداری بھی وزیراعظم ہاؤس گئے جہاں پر انہوں نے وزیراعظم شہبازشریف سے ملاقات کی، ملاقات کے دوران ملکی صورتحال پر تبادلہ خیال کیا گیا۔ چند روز قبل سابق صدر آصف علی زرداری نے کہا تھا کہ ہم پاک فوج میں پروموشن کے نظام پر مضبوط یقین رکھتے ہیں، تمام تھری اسٹار جنرلز برابر ہیں اور آرمی کی سربراہی کے مکمل اہل ہیں، سپہ سالار کی تعیناتی کا معاملہ کسی صورت بھی سیاسی نہیں ہونا چاہئیے۔ یہ اقدام ادارے کو نقصان پہنچائے گا۔ آرمی چیف کی تعیناتی قانون کے مطابق وزیراعظم کریں گے۔

بشکریہ دنیا نیوز