ملتان : ( اے پی پی ) دینا بھر میں انرجی اکنامکس اور شعبہ ماحولیات میں پاکستان کی پہچان بننے والے نامور ماہر ماحولیات ڈاکٹر محمد شہباز نے ایک اور اعزاز حاصل کرلیا۔ ڈاکٹر محمد شہباز کے تحقیقی کام اور ان کے دنیا بھر میں نمایاں حوالہ جات (سائیٹیشن) کے اعتراف میں ملائیشیا کے معروف ادارے ایچ کے گاؤ شنگ ایجوکیشن نے انہیں ایمرجنگ سائیٹیشن لوریٹ ایوارڈ سے نوازا ہے۔ ڈاکٹر محمد شہباز کی سائیٹیشن ساٹھ ہزار کے قریب ہیں۔دنیا بھر سے محقق پالیسی میکرزاور طلباوطالبات ان کی اس تحقیق کو حوالہ بنا کر اپنے کام کو آگے بڑھا رہے ہیں۔ ڈاکٹر محمد شہباز نے شعبہ ماحولیات کے ساتھ معاشیات ،شماریات اور ان سے متعلقہ ہر شعبہ میں نمایا ں کام کیا ہے۔ یورپ، امریکہ ،مشرق وسطی سمیت پوری دینا میں ان کے شاگردوں نے اس اعزاز پر انہیں مبارکباد دی ہے اور کہا ہے کہ ایسے لوگ انسانیت کے محسن ہیں۔ واضح رہے کہ ڈاکٹر محمد شہباز ان دنوں چین کی جامعہ بیجنگ انسیٹیوٹ آف ٹیکنالوجی ،کیمبرج یونیورسٹی کے ساتھ ساتھ مشرق وسطی، یورپ اور ایشیا میں کئی جامعات اور اداروں میں اپنی خدمات پیش کر کے پاکستان کا نام روشن کر رہے ہیں۔
