لاہور:ملکی سلامتی کے خلاف ایچی سن کالج کی سرگرمیاں سامنے آگئی ہیں۔ اس ادارے سے وابستہ دووائس پرنسپل اوران کے ساتھی تین سال قبل بیرون ملک پاکستان کی اہم تنصیبات کے بارے میں معلومات دیتے ہوئے پکڑے گئے۔ حساس اداروں نے ان کے غیرملکی رابطوں کا سراغ لگانے کے بعد جب انہیں گرفتار کرنا چاہاتو ایچی سن انتظامیہ نے نائیجیریا سے تعلق رکھنے والے وائس پرنسپل ڈاکٹر افضال، وائس پرنسپل اینڈریو ٹریہان اور ان کے ایک ساتھی کو گرفتاری سے بچانے کے لیے راتوں رات انہیں بیرون ملک فرار کرادیا۔ معروف وی لاگر رضوان رضی نے اپنے حالیہ وی لاگ میں ایچی سن کالج میں ہونے والی بہت سی بدعنوانیوں کی نشاندہی کی ہے۔ انہوں نے مزید بتایا کہ کالج کے پرنسپل مائیکل تھامسن کوبھارت سے یہاں لایاگیاتھا۔ یہ وہاں سٹریٹ سکول میں پڑھاتے تھے اور اس کالج کے لیے جوتعلیمی قابلیت ضروری ہے وہ اس پر بھی پورا نہیں اترتے۔ انہیں 40لاکھ روپے تنخواہ پر یہاں رکھاگیاجبکہ مجموعی طورپر ان کے اخراجات 80لاکھ روپے ہیں جن میں وہ بہت سی سہولیات بھی شامل ہیں جو انہیں بطور پرنسپل حاصل ہیں۔
انہوں نے بتایا کہ 2015ءمیں ایچی سن سکول کی پرنسپل کی ڈگری جعلی ثابت ہوئی ۔بعد ازاں انہوں نے عدالت سے حکم امتناعی حاصل کیا ۔اس دوران علامہ اقبال اوپن یونیورسٹی سے ایم اے ۔ایجوکیشن کیا اور دوبارہ اپنے عہدے پر بحال ہوگئیں۔ وہ آج بھی اس کالج میں موجودہیں۔ انہوں نے بتایا کہ کشمالہ طارق خواتین وفاقی محتسب کی چیئرپرسن تھیں انہوں نے جب یہاں طالب علموں میں منشیات کی برآمدگی کا نوٹس لیا تو ان کے بچے کو اہلیت کے باوجود یہاں داخلہ نہ دیاگیا۔ جن اساتذہ نے بااثر والدین کے بچوں سے کالج میں منشیات برآمد کیں انہیں عبرت کا نشان بنادیاگیا۔
تھامسن نے اپنے دور میں طالب علموں کے داخلوں کی تعداد2000 سے بڑھا کر 3200کردی۔ وہ امیر لوگوں سے عطیات لے کر مبینہ طورپر خود استعمال کرتے ہیں لیکن کوئی آڈٹ نہیں ہوتا۔پرنسپل تھامسن 2015ءسے اس ادارے سے وابستہ ہیں۔ 2018ءمیں ان کی ملازمت میں پہلی مرتبہ توسیع ہوئی۔ وہ ہرمرتبہ مدت ختم ہونے سے پہلے استعفے کا ڈرامہ کرتے ہیں اور مزید توسیع لیتے ہیں۔ 2020ءمیں اس وقت کے وزیراعظم عمران خان نیازی نے ان سے ملاقات کی ۔یہ ملاقات ان کے کزن عمرزمان نیازی نے کروائی تھی جس کے نتیجے میں تھامسن کو مزید توسیع ملی اورعمرنیازی کو ایچی سن کالج میں سپورٹس انچارج مقرر کردیاگیا ۔وہ آج بھی ساڑھے سات لاکھ روپے ماہوارپر یہ فرائض انجام دے رہے ہیں۔
فیس بک کمینٹ