آئی سی سی کرکٹ ورلڈکپ کے ساتویں میچ میں دفاعی چیمپئن انگلینڈ نے بنگلادیش کو 137 رنز سے شکست دے کر ایونٹ میں پہلی کامیابی حاصل کرلی۔
365 رنز کے تعاقب میں بنگلادیش کی ٹیم 48.2 اوورز میں227 رنز پر آؤٹ ہوگئی۔
بھارت کے دھرم شالا اسٹیڈیم میں کھیلےگئے میچ میں بنگلادیش نے ٹاس جیت کر فیلڈنگ کا فیصلہ کیا۔انگلینڈ نے مقررہ 50 اوورز میں شاندار کھیل پیش کرتے ہوئے 9 وکٹوں کے نقصان پر 364 رنز بنائے تھے۔
ڈیوڈ میلان 140 اور جو روٹ 82 رنز بناکر نمایاں رہے۔
واضح رہے کہ آج کے میچ کیلئے دونوں ٹیموں میں ایک ایک تبدیلی دیکھنے میں آئی، انگلش ٹیم میں معین علی کو بٹھا کر ریس ٹوپلے جبکہ بنگلایش کی ٹیم میں محمد اللہ کو آرام دیتے ہوئے مہدی حسن کوٹیم میں شامل کیا گیا۔
انگلینڈ کی اننگز
انگلینڈ کی جانب سے ڈیوڈ میلان اور جونی بیرسٹو نے اوپننگ کی اور ٹیم کو اچھا آغاز فراہم کرتے ہوئے بنگلادیش کی بولنگ کے آگے رنز کی چٹان ثابت ہوئے لیکن اوپننگ پارٹنر شپ ٹیم کو 115 رنز دینے کے بعد ٹوٹ گئی۔
جونی بیرسٹو 59 گیندوں پر 8 چوکوں کی مدد سے 52 رنز کی شاندار اننگز کھیل کربنگلادیشی کپتان شکیب الحسن کا شکار ہوگئے بیرسٹو کے بعد ڈیوڈ میلان اور اور جو روٹ کے درمیان بھی اچھی پارٹنر شپ قائم ہوئی لیکن 38 اوورز میں اوپنر ڈیوڈ میلان 16 چوکوں اور 5 چھکوں کی مدد سے 140 رنز کی شاندار اننگز کھیل کر مہیدی حسن کا شکار ہوگئے، اس کے بعد کپتان جوز بٹلر بھی 20 ، جوروٹ 82 رنز بناکر آؤٹ ہوگئے۔
انگلینڈ نے مقررہ 50 اوورز میں 9 وکٹوں کے نقصان پر 364 رنز بنائے۔
بنگلادیش کی جانب سے مہیدی حسن نے 4 جبکہ شریف الاسلام نے 3 وکٹیں حاصل کیں۔
بنگلادیش کی اننگز
365 رنز کے تعاقب میں بنگلادیش کی پہلی وکٹ دوسرے اوور کی چوتھی گیند پر گری جب تنزید حسن 14 رنز بناکر ریس ٹوپلے کی گیند پر کیچ آؤٹ ہوئے اس کی اگلی ہی گیند پر ٹوپلے نے ہی مہیدی حسن کو صفر رنز پر پویلین بھیج دیا۔
بنگلادیش کی تیسری وکٹ بھی ٹوپلے کے ہی حصے میں آئی جب انہوں نے صرف 26 رنز پر ہی کپتان شکیب الحسن کو پویلین بھیج دیا اس کے بعد مہیدی حسن میراز بھی 8 رنز بناکر پویلین لوٹ گئے جبکہ لٹن داس 76 رنز پر آؤٹ ہوگئے۔
اس کے علاوہ مشفیق الرحیم 51 اور توحید ردوئے 39 رنز بناکر پویلین لوٹے جبکہ ، تسکین احمد 13 اور شریف الاسلام نے 12 رنز بنائے۔
تاہم 365 رنز کے تعاقب میں بنگلادیش کی ٹیم 48.2 اوورز میں227 رنز پر آؤٹ ہوگئی اور انگلینڈ نے میچ 137 رنز سے سے جیت لیا۔
انگلینڈ کی جانب سے ریسی ٹوپلے نے43 رنز دے کر4 کھلاڑیوں کو آؤٹ کیا۔
یاد رہے کہ انگلینڈ اور بنگلادیش آج ورلڈکپ میں اپنا دوسرا میچ کھیل رہے تھے، انگلش ٹیم کو پہلے میچ میں نیوزی لینڈ نے شکست دی تھی جبکہ بنگلادیش نے افغانستان کو ہرایا تھا۔
گزشتہ روز انگلش کپتان جوز بٹلر نے دھرم شالا اسٹیڈیم میں خراب آؤٹ فیلڈ پر خدشے کااظہار کرتے ہوئے کہا تھا کھلاڑیوں کو فیلڈنگ کے دوران محتاط رہنا پڑے گا ، اگر یہ میری نظر میں خراب آؤٹ فیلڈ ہے تو پھر تھوڑا احتیاط کرنے کی ضرورت ہے ، جب آپ ملک کے لیے کھیل رہے ہو تے ہیں تو پھر احتیاط نہیں کر سکتے۔
واضح رہے کہ دھرم شالا میں کھیلے جانے والے پہلے میچ میں افغانستان اور بنگلا دیش کے کھلاڑیوں کو مشکلات پیش آئی تھیں، آؤٹ فیلڈ کی وجہ سے کھلاڑی سنجیدہ انجری سے بال بال بچے تھے۔
(بشکریہ: جیو نیوز)
فیس بک کمینٹ