قومی اسمبلی کے 8 اور پنجاب اسمبلی کے 3 حلقوں پر آج ضمنی انتخابات کے لیے پولنگ کا آغاز ہوگیا ہے۔
پنجاب میں فیصل آباد، ننکانہ صاحب اور ملتان میں قومی اور صوبائی اسمبلی کی 3، 3 نشستوں پر ضمنی انتخابات ہو رہے ہیں، خیبرپختونخوا میں چارسدہ، پشاور اور مردان میں قومی اسمبلی کی 3 نشستوں اور سندھ میں قومی اسمبلی کی 2 نشستوں کے لیے کورنگی اور ملیر میں ضمنی انتخابات ہورہے ہیں۔
پنجاب میں ایک ہزار 434، خیبرپختونخوا میں 979 اور کراچی میں 340 پولنگ اسٹیشنز قائم کیے گئے ہیں، پولنگ کا عمل آج صبح 8 بجے شروع ہوا جو شام 5 بجے تک جاری رہے گا۔
ملک کی سیاسی تاریخ میں یہ منفرد مثال ہوگی کہ ایک امیدوار (چیئرمین پی ٹی آئی عمران خان) 8 میں سے 7 نشستوں پر انتخاب لڑ رہے ہیں۔
آزاد امیدواروں سمیت مختلف سیاسی جماعتوں کے کُل 101 امیدوار انتخابات میں حصہ لے رہے ہیں، پنجاب میں 52، سندھ میں 33 اور خیبرپختونخوا میں 16 امیدوار ہیں، ان حلقوں میں تقریباً 44 لاکھ 72 ہزار ووٹرز رجسٹرڈ ہیں۔
پنجاب میں وفاق کی حکمراں جماعت پاکستان مسلم لیگ (ن) اور صوبے میں برسراقتدار پی ٹی آئی کے امیدواروں کے درمیان ان انتخابات میں زبردست مقابلہ متوقع ہے۔
این اے 157 ملتان سے شاہ محمود قریشی کی صاحبزادی مہربانو قریشی پی ٹی آئی کی امیدوار ہیں جن کے مدمقابل پیپلز پارٹی کے علی موسیٰ گیلانی ہیں۔
فیصل آباد-8 میں این اے 108 میں عابد شیر علی اور این اے 118 میں مسلم لیگ (ن) کی شزرا منصب علی عمران خان کے مدمقابل ہیں۔
کراچی میں ملیر اور کورنگی میں قومی اسمبلی کی 2 نشستوں پر آج ہونے والے ضمنی انتخابات کے نتائج اہم ہوں گے کیونکہ یہ 23 اکتوبر کو شہر میں ہونے والے بلدیاتی انتخابات سے محض ایک ہفتہ قبل ہورہے ہیں، جیتنے والی پارٹی کو کراچی کی مقامی حکومت کے لیے ہونے والے بلدیاتی انتخابات میں تقویت ملے گی۔
این اے 239 کے لیے 22 امیدوار میدان میں ہیں، عمران خان، ایم کیو ایم (پاکستان) کے نئیر رضا اور ٹی ایل پی کے محمد یاسین کے درمیان سخت مقابلے کا امکان ہے۔
دوسرے حلقے کا رقبہ بہت زیادہ ہے لیکن ووٹرز کی تعداد کم ہے، یہاں بھی سربراہ پی ٹی آئی اور پیپلزپارٹی کے عبدالحکیم بلوچ کے درمیان بھرپور مقابلے کا امکان ہے۔
The Election Commission of Pakistan (ECP) said earlier that a sufficient number of police and Rangers personnel would be deployed for maintaining law and order on the polling day.
قبل ازیں الیکشن کمیشن نے کہا کہ پولنگ کے دن امن و امان برقرار رکھنے کے لیے پولیس اور رینجرز کے اہلکاروں کی کافی تعداد تعینات کی جائے گی۔
خیبر پختونخوا کے 3 حلقوں این اے 22 مردان، این اے 24 چارسدہ، این اے 31 پشاور پر آج ضمنی انتخابات کے لیے پولنگ کا عمل جاری ہے۔
ان تینوں حلقوں پر سابق وزیراعظم اور سربراہ پاکستان تحریک انصاف عمران خان امیدوار ہیں
این اے 31 پشاور میں 8 امیدوار میدان میں ہیں جہاں رجسٹرڈ ووٹرز کی تعداد 4 لاکھ 73 ہزار 180 ہیں۔
عمران خان کے مقابل اے این پی کے حاجی غلام بلور اور جماعت اسلامی کے حاجی اسلم ہیں، 265 پولنگ اسٹیشنز میں سے مردوں کے لئے 146، خواتین کے 117 جبکہ 2 مشترکہ پولنگ اسٹیشنز قائم کیے گئے ہیں۔
این اے 22 مردان میں 4 امیدوار میدان میں ہیں جہاں رجسٹرڈ ووٹرز 4 لاکھ 71 ہزار184 ہیں، یہاں عمران خان کا مقابلہ جماعت اسلامی کے عبدالواسع اور جمیعت علمائے اسلام کے محمد قاسم سے ہے، حلقے میں ایک ہزار 28 پولنگ اسٹیشنز میں سے 568 مردوں کے اور 460 خواتین کے پولنگ اسٹیشنز قائم ہیں،
این اے 24 چارسدہ میں 4 امیدوار مدمقابل ہیں جہاں رجسٹرڈ ووٹرز کی تعداد 5 لاکھ 26 ہزار862 ہیں، یہاں اے این پی کے صوبائی صدر ایم ولی خان اور عمران خان کے درمیان کانٹے کا مقابلہ متوقع ہے، حلقے میں قائم 384 پولنگ اسٹیشنز میں سے 196 مردوں کے، 154 خواتین کے اور 34 مشترکہ پولنگ اسٹیشنز قائم کیے گئے ہیں۔
صوبائی الیکشن کمشنر خیبرپختونخوا محمد فرید آفریدی نے بتایا کہ خیبرپختونخوا کے تینوں حلقوں میں ضمنی انتخابات کے لئے پولنگ کا عمل شروع ہوچکا ہے جہاں سیکیورٹی کے لیے خاطرخواہ انتظامات کیے گئے ہیں۔
انہوں نے مزید کہا کہ ان حلقوں کے ووٹرز سے اپیل کی جاتی ہے کہ وہ بلاخوف و خطر جا کر قومی فریضہ سمجھ کراپنا ووٹ ڈالیں۔
سابق وزیراعظم اور چیئرمین پاکستان تحریک انصاف عمران خان نے آج ہونے ضمنی انتخابات میں اپنے کارکنان کو ووٹ ڈالنے کی ترغیب کے لیے پیغام دیتے ہوئے کہا کہ ’ان تمام حلقوں میں ووٹ ڈالنے کے لیے ہر ایک کو نکلنا چاہیے جہاں آج ضمنی انتخابات ہو رہے ہیں، یہ لٹیروں کے شکنجوں سے حقیقی آزادی کا ریفرنڈم ہے‘۔
انہوں نے اپنی ٹوئٹ میں مزید کہا کہ ہم پی ڈی ایم، الیکشن کمیشن اور ’نامعلوم افراد‘ کے خلاف لڑ رہے ہیں۔
واضح رہے کہ جن حلقوں پر آج ضمنی انتخابات ہو رہے ہیں ان میں این اے 22 مردان 3، این اے 24 چارسدہ 2، این اے 31 پشاور 5، این اے 108 فیصل آباد 8، این اے 118 ننکانہ صاحب 8، این اے 157 ملتان 4، این اے 237 ملیر 2، این اے 239 کورنگی کراچی، پی پی 241 بہاولنگر-5، پی پی 209 خانیوال 7 اور پی پی 139 شیخوپورہ-5 شامل ہیں۔
(بشکریہ: ڈان نیوز)
فیس بک کمینٹ