ملتان : کوروناوائرس کے پھیلاؤ کو روکنے کے لئے ملتان شہر کے تین علاقوں میں سمارٹ لاک ڈاؤ ن کرنے کا فیصلہ کر لیا گیا ہے ۔
ضلعی انتظامیہ نے شاہ رکن عالم کالونی،نیو ملتان اور ایم ڈی اے چوک کے علاقوں میں سمارٹ لاک ڈاؤ ن کی تجویز حکومت پنجاب کو ارسال کردی ہے۔
سفارشات بھجوانے کا فیصلہ رپورٹ ہونیوالے کورونا وائرس کے مریضوں کے حوالے سے منعقدہ ایک جائزہ اجلاس میں کیا گیا ہے،سمارٹ لاک ڈاؤ ن میں شاہ رکن عالم کا ” کے“ ” ایچ“ ” ڈی“ اور نیو ملتان کے ” وی“ اور ” وائی“ بلاک شامل ہیں ،ڈپٹی کمشنر عامر خٹک نے کہا ہے کہ ان علاقوں میں 14 دن کے لئے سمارٹ لاک ڈاؤ ن کیا جائے گا،سمارٹ لاک ڈاون کے لئے پولیس کی خدمات حاصل کی جائیں گی،ڈپٹی کمشنر نے کہا کہ ایک ڈاکٹر اور لیڈی ڈاکٹر پر مشتمل موبائل یونٹ کی خدمات ایریا کے رہائشیوں کو حاصل ہونگی،ان علاقوں کا رہائشی کوئی بھی فرد ہیلتھ موبائل ٹیم کو فون پر طلب کر سکے گا۔
کورونا مریضوں کے حوالے سے شہر کے مختلف علاقوں کو زیر مشاہدہ رکھا جارہا ہے،عامر خٹک نے کہا کہ نشتر ہسپتال اور حکومت پنجاب کی طرف سے کورونا ٹیسٹنگ کی استعداد بڑھا دی گِئی ہے،مشتبہ مریضوں کے زیر التواء رزلٹ آنے کے بعد دیگر علاقوں کے لاک ڈاون کا فیصلہ کیا جائے گا،عامر خٹک نے کہا کہ ہمیں کورونا وائرس کا مقابلہ خوف و ہراس پھیلا کر نہیں بلکہ دانشمندی سے کرنا ہے،ضلعی انتظامیہ کورونا سے بچاو بارے ایس او پیز کی خلاف ورزی پر کوئی رعایت نہیں برتے گی ۔
علاوہ ازیں کورونا ایس او پیز پر عملدرآمد کے لئے افسراں کو یونین کونسلز کی سطح پر ایریاز الاٹ کرنے کا بھی فیصلہ کیا گیا ہے۔
فیس بک کمینٹ