راولپنڈی: نیب کی حراست میں موجود سابق صدر آصف علی زرداری کو جمعرات کی شام طبعیت ناساز ہونے کے بعد راولپنڈی انسٹیٹیوٹ آف کارڈیالوجی منتقل کر دیا گیا۔ذرائع کا کہنا ہے کہ آصف زرداری کو شوگر لیول میں کمی اور بلڈ پریشر کی بھی شکایت ہے۔ذرائع کا بتانا ہے کہ ماہر امراض قلب ڈاکٹر اظہر کیانی کو آصف زرداری کے چیک اپ کے لئے راولپنڈی انسٹیٹیوٹ آف کارڈیا لوجی بلایا گیا جہاں انہوں نےآصف زرداری کا طبی معائنہ کیا۔دوسری جانب نیب حکام نے آصف زرداری کی طبیعت خراب ہونے کی تردید کی ہے۔نیب حکام کے مطابق آصف زرداری کا یہ معمول کا طبی چیک اپ ہے۔ترجمان پیپلز پارٹی کا مؤقف ہے کہ آصف زرداری کی طبیعت ناسازی سے متعلق انہیں اب تک اطلاع نہیں دی گئی۔خیال رہے کہ نیب نے 10 جون کو سابق صدر آصف علی زرداری کو اسلام آباد سے گرفتار کیا تھا۔نیب حکام کی جانب سے 11 جون کو آصف علی زرداری کو احتساب عدالت میں پیش کیا گیا جہاں سے ان کا 10 روزہ ریمانڈ حاصل کیا۔مصدقہ ذرائع کے مطابق آصف علی زرداری کوا ٓج رات کسی بھی وقت کراچی منتقل کیے جانے کاامکان ہے۔
