اہم خبریںکھیل

منتوں مرادوں کے بعد لاہور قلندرز کی پہلی کامیابی

لاہور:پی ایس ایل میں لاہور قلندرز نے دفاعی چیمپئن کوئٹہ گلیڈی ایٹرز کو 37 رنز سے شکست دے کر آخر کار فتح کا کھاتہ کھول ہی لیا۔منتوں اور مرادوں کے بعد یہ لاہور کی ایونٹ میں پہلی کامیابی ہے۔لاہور قلندرز ٹیم نے لیگ کی تاریخ کا تیسرا بڑا اور موجودہ ایونٹ کا سب سے بڑا مجموعہ اسکور بورڈ پر سجایا۔بین ڈنک اور سمت پٹیل کی عمدہ بلے بازی کی بدولت لاہور قلندرز نے مقررہ 20 اوورز میں 5وکٹوں پر 209 رنز بنائے۔
مطلوبہ ہدف کے تعاقب میں کوئٹہ گلیڈی ایٹرز ٹیم 172رنز پر ڈھیر ہوگئی۔لاہور قلندرز کے ابتدائی 3بلے باز 8ویں اوور میں50 کے اسکور پر پویلین لوٹ گئے۔کرس لِین 27، فخر زمان 15اور محمد حفیظ بغیر کوئی رنز بنائے آؤٹ ہوگئے۔چوتھی وکٹ کی شراکت میں بین ڈنک اور سمت پٹیل نے 73 گیندوں پر 155 رنز کی شراکت قائم کرکے لاہور قلندرز کا مجموعہ 200 کے پار لگانے میں مددکی۔یہ پی ایس ایل کی تاریخ میں چوتھی وکٹ کی سب سے بہترین اور مجموعی طور پر کسی بھی وکٹ کے لیے دوسری بہترین شراکت ہے۔اس سے قبل لیام لیونگ سٹون اور بابراعظم ایچ بی ایل پی ایس ایل میں157 رنز کی شراکت قائم کرچکے ہیں۔آسٹریلیا سے تعلق رکھنے والے وکٹ کیپر بیٹسمین بین ڈنک نے 43 گیندوں پر 93 رنز بنائے۔سمت پٹیل 40 گیندوں پر 71 رنز بناکر آؤٹ ہوئے۔کوئٹہ گلیڈی ایٹرز کے اوپنرز ناکام رہے۔شین واٹسن اور جیسن رائے پر مشتمل اوپننگ جوڑی ٹیم کو محض 28 رنز کا آغاز فراہم کرسکی۔ جلد وکٹ گرنے کے باعث دفاعی چیمپئن کا مڈل آرڈر بھی مکمل دباؤکا شکار نظر آیا اور یکے بعد دیگرے آؤٹ ہوکر پویلین جاتے گئے۔شین واٹسن23، جیسن رائے 12، احسان علی 2، سرفراز احمد 9،اعظم خان 12اور محمد نواز 24 رنز بناکر آؤٹ ہوئے۔محمد نواز اور بین کٹنگ نے کچھ مزاحمت کی کوشش کی مگر وہ بھی میچ کا متوقع نتیجہ بدلنے میں ناکام رہے۔دونوں کھلاڑیوں کے درمیان65 رنز کی شراکت قائم ہوئی۔بین کٹنگ نے 27گیندوں پر 53 رنز کی اننگز کھیلی۔ فواد احمدنے 13رنزبنائے۔لاہور قلندرز کے سلمان ارشاد نے 4 جبکہ دلبر حسین، محمد فیضان اور سمت پٹیل نے 2،2 وکٹیں حاصل کیں۔میچ میں جارحانہ بلے بازی کرنے پر بین ڈنک کو مین آف دی میچ قرار دیا گیا۔

فیس بک کمینٹ
Tags

متعلقہ تحریریں

Adblock Detected

Please consider supporting us by disabling your ad blocker