منی پور میں خواتین کی برہنہ پریڈ کی ویڈیو میں موجود مرکزی ملزم کا گھر نذرِ آتش : بڑے پیمانے پر گرفتاریاں

امپھال : انڈیا کی ریاست منی پور میں مئی میں کوکی اور میتی برادریوں کے درمیان جھڑپوں کے آغاز کے بعد سے اب تک 140 سے زیادہ افراد ہلاک جبکہ 50 ہزار سے زیادہ لوگ بے گھر ہو چکے ہیں۔
جمعے کو خواتین کے ایک گروپ نے مقدمے میں گرفتار مرکزی ملزم کے گھر کو آگ لگا دی تھی۔ یہ وہی شخص ہے جسے مبینہ طور پر ویڈیو میں متاثرہ خاتون کو پکڑے ہوئے دیکھا گیا ہے اور انھیں جمعرات کو پولیس کی جانب سے گرفتار کیا گیا تھا۔
ان کے گھر کو نذرِ آتش کرنے والی خواتین میتی برادری کی سب سے مضبوط تنظیم میرا پیبی سے وابستہ ہیں، جو کئی دہائیوں سے منی پور میں ایک سماجی تحریک چلا رہی ہے۔
اس ویڈیو کے سامنے آنے کے بعد انڈیا کی عدالت عظمیٰ نے ازخود نوٹس لیتے ہوئے دونوں مرکزی اور ریاستی حکومتوں کو الٹی میٹم جاری کیا ہے کہ وہ مجرموں کو قانون کے کٹہرے میں لائیں یا ایک طرف ہٹ جائیں اور عدلیہ کو کارروائی کرنے دیں۔
ان دونوں حکومتوں پر منی پور میں حالات کو معمول پر لانے میں ناکامی کا الزام ہے۔ چنانچہ سوشل میڈیا پر جہاں ایک طرف وزیر اعلی اور انڈیا کے وزیر داخلہ امت شاہ کے استعفے کی بات ہو رہی ہے وہیں وزیر اعظم کے استعفے کے مطالبے کا ہیش ٹیگ بھی گردش کر رہا ہے۔
اب تک ریاست میں تشدد کے تقریباً پانچ ہزار کیس درج کیے جا چکے ہیں تاہم انڈیا کے وزیر اعظم نریندر مودی نے مہینوں سے جاری اس مہلک نسلی تنازعے پر اپنی خاموشی جمعرات کے روز اس وقت توڑی تھی جب سوشل میڈیا پر ایک ویڈیو سامنے آئی تھی جس میں کئی خواتین کی برہنہ پریڈ کروائی گئی، مارا پیٹا گیا اور ان میں سے ایک کے ساتھ مبینہ طور پر ریپ ہوا تھا۔
دریں اثنا پارلیمنٹ میں حزب اختلاف منی پور میں ہونے والے فسادات پر وزیراعظم کی خاموشی پر سراپا احتجاج ہے لیکن انڈین میڈیا کے مطابق گذشتہ روز وزیر اعظم دونوں ایوانوں سے غیر حاضر رہے۔بہرحال انھوں نے جمعرات کو پارلیمنٹ کے افتتاحی اجلاس سے خطاب کرتے ہوئے منی پور میں میتی اور کوکی قبائل کے درمیان جاری تنازعے پر اپنا پہلا تبصرہ کیا اور کہا کہ ’خواتین پر حملے سے ‘پورا ملک شرمسار ہوا ہے۔‘
انھوں نے کہا کہ ’میں قوم کو یقین دلانا چاہتا ہوں کہ کسی بھی قصوروار کو بخشا نہیں جائے گا۔ قانون کے مطابق کارروائی کی جائے گی۔
’منی پور کی بیٹیوں کے ساتھ جو ہوا اسے کبھی معاف نہیں کیا جا سکتا۔ جب میں جمہوریت کے اس مندر کے پاس کھڑا ہوں تو میرا دل درد اور غصے سے بھر جاتا ہے۔‘
( بشکریہ : بی بی سی اردو )