لاہور ۔۔5مئی :نئی مردم شماری کے بعد قومی اسمبلی میں پنجاب کی 8نشستیں کم ہوجائیں گی جبکہ سندھ اوربلوچستان کی سیٹوں میں اضافے کاامکان ہے۔”لوک سجاگ “ ویب سائٹ پرمعروف صحافی طاہرمہدی کی ایک رپورٹ میں بتایاگیاہے کہ 2023ءکی مردم شماری میں پنجاب کی آبادی پاکستان کی مجموعی آبادی کے نصف کے برابرہوگئی ہے۔رپورٹ میں ادارہ شماریات پاکستان کے حالیہ ٹویٹ کاحوالہ بھی دیاگیاہے جس میں ادارے نے بتایاہے کہ 30اپریل 2023ءتک پا کستان کی مجموعی آبادی 23کروڑ 36لاکھ شمار کی گئی ہے جبکہ پنجاب میں گیارہ کروڑ 68لاکھ افراد رہتے ہیں جوپاکستان کی مجموعی آبادی کاپچاس فیصدہے ۔
رپورٹ کے مطابق 1951ءکی مردم شماری میں اس وقت کے مغربی پاکستان کی کل آبادی کا61فیصد پنجاب میں رہتاتھا۔تاہم بعد کی تمام مردم شما ریوں میں یہ شرح کم ہوتی چلی گئی ۔حالیہ کمی کانتیجہ یہ نکلے گا کہ قومی اسمبلی میں پنجاب کی 8سیٹیں کم ہوجائیں گی یعنی موجودہ 141سیٹیں کم ہوکر 133رہ جائیں گی جوقومی اسمبلی کی 266نشستوں کا نصف ہیں ۔نئے اعدادوشمار کے مطابق قومی اسمبلی میں سندھ کی نشستوں میں ایک سیٹ کااضافہ ہوگا جوموجودہ 61سے بڑھ کر 62ہوجائیں گی ۔سب سے زیادہ فائدہ بلوچستان کو ہوگا وہاں 7نشستوں کااضافہ ہوگاجو16سے بڑھ کر 23ہوجائیں گی ۔موجودہ اور گزشتہ مردم شماریوں کے دوران پنجاب کی آبادی میں 6فیصد اورخیبرپختون خوا کی آبادی میں گیارہ فیصد اضافہ ہواتاہم خیبرپختون خوامیں قومی اسمبلی کی نشستوں میں کوئی ردوبدل نہیں ہوگا ۔
فیس بک کمینٹ