اسلام آباد : چیئرمین پاکستان تحریک انصاف عمران خان 18اگست کو پاکستان کے وزیراعظم کے عہدے کا حلف اٹھائیں گے۔اس بات کا اظہار تحریک انصاف کے سینیٹر فیصل جاوید خان نے کیا ہے، انہوں نے بتایا کہ عمران خان 18اگست کو وزیراعظم کے عہدے کے لیے حلف اٹھائیں گے۔صدر مملکت ممنون حسین نے قومی اسمبلی کا اجلاس 13اگست کو طلب کیا ہے، اس اجلاس میں نو منتخب اراکین اسمبلی حلف اٹھائیں گے جس کے بعد اسپیکر اور ڈپٹی اسپیکر قومی اسمبلی کا چناؤ کیا جائے گا، وزیراعظم کے انتخاب کے لیے اسمبلی اجلاس یوم آزادی کی تعطیل کے بعد طلب کیا جائے گا۔ذرائع کے مطابق پاکستان تحریک انصاف کے چیئرمین عمران خان 18 اگست کو وزراتِ عظمیٰ کا حلف اٹھائیں گےپی ٹی آئی کے رہنما و سینیٹر فیصل جاوید نے بھی عمران خان کے حلف اٹھانے کی 18 اگست تاریخ مقرر ہونے کی تصدیق کردی۔ادھر حزب اختلاف کے گرینڈ الائنس نے عمران خان کے مد مقابل مسلم لیگ ن کے صدر میاں شہبازشریف کو وزراتِ عظمیٰ کیلئے امیدوار نامزد کیا ہے، پیپلز پارٹی کے خورشید شاہ کو اسپیکر قومی اسمبلی اور متحدہ مجلس عمل کے مولانا اسعد محمود کو ڈپٹی اسپیکر کا امیدوار نامزد کیا ہے۔واضح رہے کہ عام انتخابات 2018ء میں پاکستان تحریک انصاف نے قومی اسمبلی میں بھاری اکثریت حاصل کی جس کے بعد وفاق میں حکومت بنانے کے لیے اس کی اتحادی جماعتوں میں ایم کیوایم، بی این پی (مینگل)، بی اے پی اور مسلم لیگ (ق) شامل ہیں جبکہ پی ٹی آئی کو اب تک متعدد آزاد امیدواروں کی حمایت بھی حاصل ہوچکی ہے۔علاوہ ازیں الیکشن کمیشن آف پاکستان نے ووٹ کی رازداری ظاہر کر نے پر ازخودنوٹس کیس میں چیئرمین پاکستان تحریک انصاف عمران خان کی معافی قبول کرلی۔الیکشن کمیشن آف پاکستان نے عمران خان کی معافی قبول کرنے کے بعد ان کی این اے 53سے کامیابی کا نوٹیفیکشن جاری کرنے کا حکم بھی دے دیا ہے۔
Previous Articleحکومت سازی شروع : قومی اسمبلی کا اجلاس 13 اگست کو طلب
Next Article تبدیلی بھی ڈسپلن میں ہے: عمار غضنفر