ایبٹ آباد : لیفٹیننٹ جنرل نگار جوہر کو آرمی میڈیکل کور (اے ایم سی) کی کرنل کمانڈنٹ تعینات کردیا گیا اور وہ یہ عہدہ حاصل کرنے والی پہلی خاتون ہیں۔پاک فوج کے شعبہ تعلقات عامہ (آئی ایس پی آر) سے جاری بیان کے مطابق چیف آف آرمی اسٹاف جنرل قمر جاوید باجوہ نے اے ایم سی سینٹر ایبٹ آباد کا دورہ کیا۔بیان میں کہا گیا کہ آرمی چیف نے اس دوران لیفٹیننٹ جنرل نگار جوہر کو نئی رینک کے بیج لگائے۔تقریب سے خطاب کرتے ہوئے آرمی چیف نے کہا کہ پہلی خاتون تھری اسٹار جنرل کو اے ایم سی کی کرنل کمانڈنٹ تعینات کرنا ‘پاک آرمی اور ملک کے لیے فخر کی بات ہے’۔
انہوں نے امن اور جنگ کے دوران صحت کے اعلیٰ معیار کو یقینی بنانے پر اے ایم سی کی خدمات کو سراہا۔آرمی چیف نےکہا کہ ‘اے ایم سی ہمیشہ ملک کے اندر اور بیرون ملک قدرتی آفات کے دوران خدمات انجام دی ہیں، ہمارے ڈاکٹرز اور طبی عملہ کووڈ-19 کے خلاف صف اول کے سپاہی رہے ہیں اور مثالی کردار ادا کیا اور پاکستان کے عوام کی سلامتی اور بہتری کے لیے کام کیا’۔انہوں نے کہا کہ ڈاکٹروں اور طبی عملے کے لیے میڈیکل سائنس کی جدت سے وقت کے ساتھ آشنا ہونا ضروری ہے، اس طرح وہ جدید فوجوں کا لازمی جزو ہیں اور عالمی سطح پر بہترین طبی خدمات انجام دیتے ہیں۔
خیال رہے کہ لیفٹیننٹ جنرل نگار جوہر آرمی میڈیکل کالج کی گریجویٹ ہیں اور فیملی میڈیسن میں ایم سی پی ایس، ایڈوانس میڈیکل ایڈمنسٹریشن میں ایم ایس سی اور صحت عامہ میں ماسٹرز کی ڈگری حاصل کر رکھی ہے۔
انہوں نے ایمرجنسی میں ہسپتال پریپیئرڈنس کی قومی انسٹرکٹر کے طور پر بھی خدمات انجام دی ہیں۔ان کا فوجی کیریئر اولیت سے بھرپور ہے، پہلی تھری اسٹار جنرل خاتون ہیں، کسی آرمی ہسپتال کی پہلی خاتون کمانڈ افسر بن گئی تھی جب انہوں نے کمبائنڈ ملیٹری ہسپتال جہلم کی سربراہی کی تھی۔
لیفٹننٹ جنرل نگار جوہر نے وقت کے ساتھ ترقی پاتے ہوئے ملٹری ہسپتال راولپنڈی کی کمانڈنگ کی تھی۔انہیں تمغہ امتیاز ملیٹری سے نوازا جاچکا ہے اور آرمی میڈیکل کور میں مثالی خدمات پر وزیراعظم پاکستان کی جانب سے فاطمہ جناح گول میڈل بھی حاصل کرچکی ہیں۔رواں برس کے شروع میں انہیں ہلال امتیاز سے بھی نوازا گیا تھا۔
لیفٹیننٹ جنرل نگار جوہر کی زندگی پر ایک ٹیلی فلم بھی رواں برس نشر کی گئی تھی، جس میں ان کا کردار مشہور اداکارہ ماہرہ خان نے ادا کیا تھا۔
( بشکریہ : ڈان نیوز )
فیس بک کمینٹ