لیفٹیننٹ جنرل نگار جوہر کی زندگی پر ٹیلی فلم : ماہرہ خان کردار ادا کریں گی

راول پنڈی : اداکارہ ماہرہ خان سے متعلق خبریں زیر گردش ہیں کہ وہ جلد ہی آئی ایس پی آر کے پراجیکٹ میں کام کرتی نظر آئیں گی۔
میڈیا رپورٹس میں دعویٰ کیا جارہا ہے کہ اداکارہ ماہرہ خان ان دنوں آرمی میڈیکل کالج راولپنڈی میں لیفٹیننٹ جنرل نگار جوہر کی زندگی پر بننے والی ٹیلی فلم کے لیے کام کررہی ہیں۔اس فلم میں اداکار بلال اشرف بھی ان کے ساتھ ہوں گے ٹیلی فلم سے متعلق کہا جارہا ہے کہ فلم آئی ایس پی آر کی پروڈکشن میں تیار کی جانے والی بائیو پک ہے۔
یہ ٹیلی فلم 14 اگست کو اے آر وائی سے ٹیلی کاسٹ ہو گی ۔دوسری جانب سوشل میڈیا صارفین بھی ماہرہ خان کے آئی ایس پی آر پراجیکٹ کا حصہ بننے پر جوش وخروش کا اظہار کرتے ہوئے انہیں سراہ رہے ہیں۔خیال رہے کہ نگار جوہر پاکستان کی تاریخ میں لیفٹیننٹ جنرل کے عہدے پر فائز ہونے والی واحد خاتون ہیں اور ان کا تعلق آرمی میڈیکل کور سے ہے۔