اسلام آباد : اقبال ڈے پر عام تعطیل کا اعلان کر دیا گیا۔ میڈیا رپورٹ کے مطابق وفاقی حکومت نے 9 نومبر کو اقبال ڈے پر عام تعطیل کا اعلان کر دیا ہے،9 نومبر کی چھٹی کا نوٹیفکیشن بھی جاری کر دیا گیا ہے۔وزیرا عظم ہاؤس کی جانب سے 9 نومبر کی چھٹی کا نوٹیفیکشن جاری کیا گیا۔اس سے قبل 2015 تک یوم اقبال بطور قومی دن منایا جاتا تھا اور اس دن عام تعطیل ہوتی تھی۔پھر 2015 کے بعد یوم اقبال کی چھٹی منسوخ کر دی گئی۔
نو نومبر کی چھٹی شاعر مشرق علامہ محمد اقبال کی سالگرہ کی وجہ سے دی جاتی تھی۔ واضح رہے کہ گزشہ سال سینیٹ میں 9 نومبر کی چھٹی بحال کرنے کی قرار داد کو اراکین نے متفقہ طور پر منظور کیا۔ 10 نومبر 2021 کو ہونے والے سینیٹ اجلاس کے دوران اس وقت کی حکومت کی اتحادی جماعت مسلم لیگ ق کی جانب سے 9 نومبر کی چھٹی بحال کرنے کا مطالبہ کیا گیا۔ ق لیگ کے سینیٹر کامل علی آغا کی جانب سے 9 نومبر کی چھٹی بحال کرنے کی قرارداد ایوان میں پیش کی تھی، جسے بعد میں متفقہ طور پر منظور کر لیا گیا۔سینیٹر کامل علی آغا نے کہا کہ علامہ اقبال کی سالگرہ پر ہمیشہ چھٹی ہوتی تھی،خواہش ہے کہ 9 نومبر کی چھٹی بحال کی جائے۔
دوسری جانب یوم اقبال پر عام تعطیل کے اعلان پر علامہ اقبال کی بہو جسٹس ریٹائرڈ ناصرہ جاوید اقبال نے شکوہ کیا ہے۔سابق جسٹس جاوید اقبال کی اہلیہ اور موجودہ سینیٹر ولید اقبال کی والدہ ناصرہ جاوید اقبال کا کہنا ہے کہ لوگوں کواقبال کےخیالات سے محروم رکھنے کیلئے عام تعطیل کااعلان کیاگیا۔ناصرہ جاوید اقبال نے کہا کہ پانچ تقریبات میں مجھے مدعو کیا گیا تھا جو سب منسوخ ہوگئیں۔انہوں نے کہا کہ عام تعطیل پرلوگ نہاری اور دہی بھلے کھائیں گے۔