”اسے کہنا دسمبر آ گیا ہے “پروفیسر عرش صدیقی نظم سوشل میڈیاپر وائرل ہوگئی

ملتان۔یکم دسمبر (اے پی پی):ملتان سے تعلق رکھنے والے نامورشاعر اورافسانہ نگار پروفیسر عرش صدیقی کی نظم ”اسے کہنا دسمبرآگیا ہے“سوشل میڈیا پر وائرل ہوگئی۔
یہ نظم ہرسال دسمبر کے مہینے میں شعرو ادب کے ساتھ دلچسپی رکھنے والوں کے دل کی آواز بن جاتی ہے۔ پروفیسر عرش صدیقی انگریزی ادب کے استاد تھے۔انہوں نے طویل عرصہ زکریایونیورسٹی میں رجسٹرار کی حیثیت سے فرائض انجام دیئے۔ 8اپریل 1997ءکو ان کاملتان میں انتقال ہوا۔
ان کی نظم کچھ اس طرح ہے
اسے کہنا دسمبر آگیا ہے
دسمبر کے گزرتے ہی برس اک اور ماضی کی گپھا میں ڈوب جائے گا
اسے کہنا دسمبر لوٹ آئے گا
مگر جو خون سو جائے گا جسموں میں نہ جاگے گا
اسے کہنا ہوائیں سرد ہیں
اور زندگی کہرے کی دیواروں میں لرزاں ہے
اسے کہنا شگوفے ٹہنیوں میں سو رہے ہیں
اوران پربرف کی چادر جمی ہے
اسے کہنا اگر سورج نہ نکلے گا تو کیسے برف پگھلے گی
اسے کہنا کہ لوٹ آئے ۔