سویلینز کا ملٹری ٹرائل کیس: سلمان راجہ سمیت دیگر وکلا نا پہنچے، عدالت برہم

اسلام آباد: سپریم کورٹ میں سویلینز کے ملٹری ٹرائل سے متعلق کیس کی سماعت میں وکلا احتجاج کے باعث نا پہنچ سکے۔
سپریم کورٹ میں جسٹس امین الدین خان کی سربراہی میں 7 رکنی آئینی بینچ نے فوجی عدالتوں میں سویلینز کے ملٹری ٹرائل کے خلاف انٹرا کورٹ اپیل پر سماعت کی۔
اسلام آباد میں وکلا کے احتجاج کے باعث فوجی عدالت سے سزا یافتہ ملزمان کے وکیل سلمان اکرم راجہ سمیت دیگر وکلا سپریم کورٹ نہ پہنچ سکے۔
وکیل رانا وقار نے عدالت کو بتایا کہ سلمان اکرم راجہ ٹریفک میں پھنسے ہوئے ہیں، اس پر جسٹس مندوخیل نے برہمی کا اظہار کرتے ہوئے کہا کہ آج معلوم تھا راستے بند ہیں تو ٹائم پر نکل آتے، شاید یہ چاہتے ہیں ملزمان جیلوں میں سڑتے رہیں، اگر کیس نہیں چلانا چاہتے تو ان کی مرضی ہے۔
جسٹس امین الدین نے عدالت عملے سے پوچھا کیا دوسرے کسی بھی فریق کا کوئی وکیل ہے؟ جس پر بتایا گیا کہ کسی فریق کا کوئی وکیل نہیں پہنچ سکا، ویڈیو لنک پر بھی کوئی وکیل موجود نہیں ہے۔
بعد ازاں سپریم کورٹ نے فوجی عدالتوں میں سِولینزکے مقدمات سےمتعلق کیس کی سماعت کل تک ملتوی کردی۔
(بشکریہ:جیونیوز)