ملتان : (اے پی پی):معروف صحافی اورپی ایف یوجے سمیت مختلف صحافتی تنظیموں کے سابق عہدیداررشید ارشد سلیمی نے کہاہے کہ جنوبی پنجاب میں غنی چوہدری مرحوم کی صحافتی خدمات کو ہمیشہ یادرکھاجائے گا۔انہوں نے ملتان کے صحافیوں کی فلاح وبہبودکے لئے گراں قدرخدمات انجام دیں ۔
ملتان پریس کلب کی تاریخ میں ان کی صدارت کادورہمیشہ سنہری حروف سے لکھاجائے گا،وہ آزادی اظہارپریقین رکھتے تھے اورسرکاری خبررساں ایجنسی سے وابستگی کے باوجود حکمرانوں سے تلخ سوالات سے بھی گریز نہیں کرتے تھے ۔ان خیالات کااظہارانہوں نے نامورصحافی اوراے پی پی ،اسلام آباد کے سابق ایگزیکٹوڈائریکٹر غنی چوہدری کی پہلی برسی کے موقع پراے پی پی سے بات چیت کے دوران کیا۔غنی چوہدری کا26اگست 2021ءکو طویل علالت کے بعد بہاولپورمیں انتقال ہوگیاتھا۔غنی چوہدری نے پاکستان ٹائمز سے اپنے صحافی کیریئر کاآغازکیا۔وہ1964ءمیں ایسوسی ایٹڈپریس آف پاکستان (اے پی پی )سے منسلک ہوئے اور34برس تک اسی ادارے کے ساتھ وابستہ رہے ۔انہوں نے اے پی پی کے قائم مقام ڈی جی کی حیثیت سے بھی خدمات انجام دیں ۔1993ءسے 1997ءتک وہ اے پی پی لندن آفس میں تعینات رہے ۔
غنی چوہدری نے اے پی پی ملتان کے اسٹیشن منیجر کی حیثیت سے بھی فرائض انجام دیئے ،انہی کی کوششوں سے اے پی پی ملتان آفس کے لئے وہ زمین حاصل ہوئی جس پرآج اے پی پی ملتان کا دفترقائم ہے ۔
فیس بک کمینٹ