کرکٹ کے انتہائی معتبر ترین ادارے وژڈن نے 6عشروں سے زائد ریکارڈ کی بنیاد پر بہترین کائونٹی ٹیم کا انتخاب کیا ہے،آپکو یہ جان کر مسرت ہوگی کہ جس کائونٹی نے نمبر ون پوزیشن حاصل کی ہے ،اس سے پاکستان کے لیجنڈری کرکٹر وسیم اکرم کا بھی تعلق رہا ہے،لنکا شائر کیلئے کھیلنے والے سوئنگ کے سلطان نے اپنی بے پناہ صلاحیت سے ٹیم کو گراں قدر فتوحات دلوائی ہیں۔اعدادوشمار کے مطابق1990کے عشرے میں لنکا شائر کی ٹیم ٹاپ پر رہی اور یہ وہ زمانہ تھا جب پاکستانی پیسر اپنے عروج پر تھے۔1963سے 2020تک 57 سال کے عرصے میں لنکا شائر 406فتوحات کے ساتھ پہلی پوزیشن بنانے میں کامیاب رہی،واروکشائر 393 اور ایسیکس کائونٹی 375کے ساتھ تیسرے نمبر پرہے۔
**سر اینڈریو سٹائرس کا کیون پیٹرسن کا کیریئر برباد کرنے کا اعتراف**
انگلینڈ کے سابق کپتان وڈائریکٹر سر اینڈریو سٹائرس نے سالہا سال بعد ساتھی بلے باز کیون پیٹرسن کا کیریئر برباد کرنے کا اعتراف کیا ہے۔کیون پیٹرسن اسکا پہلے اظہار بھی کرچکے تھے لیکن سٹائرس کے اعترافی بیان نے انکی پوزیشن کلیئر کردی،انگلینڈ کیلئے مجموعی طور پر 32 سنچریز کی مدد سے 13000سے زائد رنزبنانے والے کیون پیٹرسن اس وقت زیر عتاب آئے جب 2012 میں دورہ جنوبی افریقا کے دوران کے پی نے اپنے کپتان سٹائرس کیخلاف تضحیک آمیز میسجز جنوبی افریقی کرکٹرز کے موبائل فون پر بھیجے جب اس بات کا علم سٹائرس کو ہوا تو کپتان کے طور پر انہوں نے پہلے انہیں نظر انداز اور پھر بے وقت ڈراپ کرنا شروع کردیا ،رہی سہی کسر اس وقت پوری ہوگئی جب 2014کی آسٹریلیا میں کھیلی گئی ایشز میں کے پی مکمل ناکام ہوگئے اس کے بعد انکے کیریئر پر فل اسٹاپ لگ گیا۔سٹائرس کہتے ہیں کہ انکی میسجنگ پر مجھے غصہ آیا اور میں نے بھی پھر وہی کیا جو رد عمل میں ہوتا ہے لیکن آج مجھے احساس ہے کہ اگر ایسا نہ ہوتا تو پیٹرسن کا کیریئر جلد انجام کو نہ پہننچتا۔
***انگلش خاتون کرکٹ کوچ لاک ڈاؤن میں قید **
انگلش خاتون کرکٹ کوچ ارجنٹائن کے لاک ڈائون میں قید ہوگئی ہیں،کسی بھی ہنگامی حالت میں انہیں اپنے ملک سفر کی بھی اجازت نہیں ہے۔برطانوی نژاد سیان کیلی جو اس وقت ارجنٹائن ویمنز ٹیم کی ہیڈ کوچ ہیں ،کو بیونس آئرس میں نزدیکی سپر مارکیٹ بھی جانے کی اجازت نہیں ہے ،انکے لئے دوسری بڑی مصیبت یہ ہوئی ہے کہ انکے پارٹنر لاک ڈائون کیخلاف ورزی پر اس وقت سرکاری حکام کی تحویل میں ہیں ۔کیلی 2016میں 20 سال کی عمر میں سولی ہل سے بیونس آئرس منتقل ہوئی تھیں،انہوں نے اعلی تعلیم حاصل کی اور ویمنز کرکٹ کی بہتری کیلئے سرگرم ہوگئی تھیں۔
**اے بی ڈی ویلییئرز کی لاک ڈائون میں نرالی پریکٹس**
جنوبی افریقا کے لیجنڈری پلیئر اے بی ڈی ویلیئرز کا نام کسی تعارف کا محتاج نہیں،کورونا وائرس انکے کرکٹ کیریئرکےدوسرے ڈیبیو کی راہ میں کڑی رکاوٹ بنا ہوا ہے،2018میں اچانک ریٹائرمنٹ لینے والے اسٹائلش بیٹسمین نے ورلڈ ٹی 20 سے کرکٹ میں دوسرا جنم لینا ہے اسکے لئے انکی کرکٹ جنوبی افریقا سے گفتگو بھی ہوچکی ہے ،اب ایونٹ 7ماہ کی دوری پر ہے اور اس سے قبل انہیں اپنی پریکٹس اور فارم بھی ثابت کرنی ہے،کورونا لاک ڈائون میں انکی حالت دوسروں سے زیادہ پریشان کن ہے چنانچہ انکی پریکٹس ویڈیو بھی ویسی ہی سامنے آئی،فرش پر لیٹے وہ ٹینس بال کو چھت پر مارتے ہوئے کیچ کی پریکٹس کرتے پائے گئے،گویا ڈی ویلیئرز آرام کرتے ہوئے بھی فل پریکٹس کر رہے ہیں۔
فیس بک کمینٹ