تائیوان میں شدید زلزلہ : بھاری جانی نقصان کا خدشہ

ہولین : تائیوان کے شہر ہولین میں منگل کی رات چھ اعشاریہ چار کی شدت سے آنے والے زلزلے کے نتیجے میں کم ازکم دو افراد ہلاک اور 100 کے قریب زخمی ہو گئے ہیں۔ بھاری جانی نقصان کا خدشہ ہے ۔زلزلے کے نتیجے میں بہت سی عمارتیں منہدم ہو گئی ہیں۔زلزلہ مقامی وقت کے مطابق گیارہ بج کر پچاس منٹ پر آیا اور اس کا مرکز تائیوان کے ساحل سے بیس کلو میٹر دور سمندر میں تھا۔سوشل میڈیا پر لوگوں کی طرف سے لگائی جانے والی تصاویر سے اندازہ ہوتا ہے کہ کثیر المنزلہ عمارتوں اور سڑکوں کو شدید نقصان پہنچا ہے۔امدادی کارکن ایک کثیر المنزلہ ہوٹل کی عمارت میں، جو زلزلے سے ایک سمت جھک گئی تھی، پھنسے ہوئے افراد کو نکالنے کی کوششیں کر رہے تھے۔عینی شاہد زینہ سٹاربک نے بی بی سی کو بتایا کہ ’ہم جانتے ہیں کہ وہاں اندر لوگ پھنسے ہوئے ہیں۔ ہم ہوٹل کے اندر روشن لائٹس دیکھ سکتے ہیں۔‘اب تک عمارت سے کم ازکم 28 افراد کو زندہ نکال لیا گیا۔مقامی میڈیا کا کہنا ہے کہ کچھ لوگ نے اپنی حفاظت، کے لیے پیٹ کے بل چلے۔حکومت نے مدد کے لیے فوج کو طلب کر لیا ہے۔ہائی ویز اور رابطہ پلوں کو بہت نقصان پہنچا ہے اور وہ ٹریفک کے لیے بند کر دیے گئے ہیں۔دو سال قبل آج ہی کے روز تائیوان میں چھ اعشاریہ چار کی شدت سے زلزلہ آیا جس کے نتیجے میں 117 افراد ہلاک ہوئے تھے۔