بنی گالہ کے باہر دھرنا ، لاٹھی چارج : کارکن مجھے بلیک میل نہیں کر سکتے : عمران

اسلام آ باد : انتخابی ٹکٹوں کی تقسیم پر پی ٹی آئی مشکلات کا شکار ہوگئی،بنی گالہ میں ناراض کارکنوں کا احتجاج عید کے تیسرے روز بھی جاری رہا ،عمران خان کے گھر میں گھسنے کی کوشش پر پولیس نے لاٹھی چارج کیا ۔تحریک انصاف کے سربراہ عمران خان کی دوبار کی کوشش ناکام ثابت ہوئی،ناراض کارکنوں نے پی ٹی آئی چیئرمین کی بات ماننے سے انکار کردیا ۔عمران خان اپنے گھر کے باہر احتجاج کررہے کارکنوں کے درمیان پہنچ گئے اور کہا کہ ٹکٹوں کی تقسیم کے لیے گھنٹوں بیٹھ کر تفتیش کی ہے،وہ بھی انسان ہیں ، غلطیاں ہوسکتی ہیں ۔انہوں نے کارکنوں کو واپس جانے کی ہدایت کی جس پر کارکن بولے اگر آپ چور کو ٹکٹ دیں گے تو ہم کہاں جائیں گے؟کارکنان نے شکوہ کیا کہ جنہوں نے پارٹی کے لیے ممبرسازی کی انہیں ٹکٹ نہیں دیا گیا ، ٹکٹوں کی تقسیم پر میرٹ کو نہیں دیکھا گیا ۔عمران خان نے اس موقع پر کہا کہ ٹکٹوں کی تقسیم کے فیصلے پارلیمانی بورڈ کی مشاورت سے میرٹ پر کر رہا ہوں، پہلے بھی کہا کہ اگر کسی کو غلط ٹکٹ ملا تو نظرثانی کریں گے، تین دن بیٹھنے لگے ہیں اور شکایات پر فیصلہ کریں گے۔ان کامزید کہناتھاکہ فیصلے دیانتداری کے ساتھ اللہ کے ڈر سے کر رہا ہوں، کارکنوں سے پوچھتا ہوں کیا احتجاج کے زور پر میرا فیصلہ تبدیل کرواسکتے ہیں ۔پی ٹی آئی چیئرمین نے یہ بھی کہا کہ 10 کی بجائے10 ہزار کارکنان بھی آجائیں تو جو فیصلہ کیا اسے تبدیل نہیں کروں گا ، اگر آپ کو لگتا ہے ٹکٹ کی تقسیم ٹھیک نہیں ہوئی تو دلیل لکھ کر دیں ۔عمران خان نے کہا ہے کہ ٹکٹوں کی تقسیم کے معاملے پر کسی سے بلیک میل نہیں ہوں گا ۔ ایکسپریس نیوز کے مطابق بنی گالہ میں دھرنا دینے والے پی ٹی آئی کے امیدواروں اور کارکنوں سے خطاب کرتے ہوئے عمران خان کا کہنا تھا کہ اگر آج چند لوگوں کی موجودگی پر فیصلے تبدیل کیے تو کل اس سے زیادہ تعداد میں لوگ جمع ہوکر آئیں گے تو وہ بھی مطالبات پیش کریں گے۔عمران خان نے دوٹوک الفاظ میں کہا کہ وہ کسی کے دباؤ میں نہیں آئیں گے اور نہ کسی بلیک میلنگ کا شکار ہوں گے ،جن امیدواروں کو شکایات ہیں وہ درخواست جمع کرائیں اور دلائل دیں ہم ان کی درخواستوں پر نظرثانی کریں گے اور میرٹ پر فیصلے کریں گے لیکن کسی کے احتجاج پر فیصلے تبدیل نہیں کریں گےواضح رہے کہ پی ٹی آئی کے کئی امیدوار کارکنوں کے ہمراہ بنی گالا میں ٹکٹوں کی تقسیم پر ناراض ہوکر دھرنا دیے بیٹھے ہیں ، احتجاج کرنے والے امیدواروں نے کاغذات نامزدگی جمع کرا رکھے ہیں اور ان کا مطالبہ ہے کہ انہیں ٹکٹ جاری کئے جائیں ۔