ملتان ( ندیم قیصر سے ) پاکستان کرکٹ بورڈ نے پاک بنگلہ دیش یوتھ سیریز کا ترمیمی شیڈول جاری کردیا جس کے بعد پاک بنگلہ دیش یوتھ سیریز کیلئے ہنگامی طور پر ملتان سٹیڈیم پر انتظامات کا آغاز کردیا گیا۔
ترمیمی شیڈول کے مطابق بنگلہ دیش کی ٹیم یکم نومبر کو فیصل آباد پہنچتے ہی بذریعہ روڈ ملتان کیلئے روانہ ہو گی۔پاکستان کی یوتھ ٹیم لاہور سے ملتان پہنچے گی۔سیریز کے اکلوتے چا روزہ میچ سے قبل پاکستان اور بنگلہ دیش کی ٹیمیں دوروز 2اور 3 نومبر کو ملتان سٹیڈیم پر پریکٹس کریں گی۔پاک بنگلہ دیش یوتھ ٹیموں کے مابین سیریز کا واحد چار روزہ چار نومبر تا سات نومبر ملتان سٹیڈیم پر کھیلا جائے گا دونوں ممالک کی یوتھ ٹیموں کے مابین تین ون ڈے میچز 10 نومبر ۔12اور 14نومبر کو کھیلے جائیں گے۔ دونوں ملکوں کی یوتھ ٹیمیں دو ٹی 20 میچز 16اور 18نومبر کو مدمقابل ہوں گی ۔بنگلہ دیش کی ٹیم یوتھ سیریز کے اختتام پر 19نومبر کو ملتان سے اپنے وطن کیلئے روانہ ہو جائے گی ۔
دوسری جانب پاک بنگلہ دیش یوتھ سیریز کے تمام میچز ہنگامی طور پر فیصل آباد سے ملتان منتقل کیے جانے بارے کرکٹ بورڈ نے کسی واضح موقف کا اظہار نہیں کیا تاہم ذرائع کے مطابق عمران خان کا لانگ مارچ شروع ہونے کے بعد فیصل آباد میں سیکورٹی کے حوالے سے بعض خدشات کا اظہار کیا گیا تھا۔
فیس بک کمینٹ